«Кӱвар йымач марлан ом кай!»

Зоя олаште пашам ышта. Каныш кечылан шочмо ялышкыже вашка. Мӧҥгыштӧ тудым аваж ден ачаже вучат. Кеҥежым ялыште паша шуко: пӧрт сомылым варандараш кӱлеш, сад-пакчаштат паша ситышашлык. Шуматкечын, эрденак кынелын, Зоя веранде кӱварым, тошкалтышым чиялтен лекте. Ош кагаз лаштыкеш «Чиялтыме!» манын возыш да кнопка дене омсаш пижыктыш.

Вара, пӧртыш кӱвар йымач пурен, кечывал кочкышым шолташ пиже. Ача ден авам тамле кочкыш дене сийлен кодаш шонен пыштыш. Тиде пагытыште кудывечыште пий опталтыш. Зоя, содор гына окна воктеке миен, уремыш ончале. Капка воктеке машина толын шогалын. Тушеч палыдыме еҥ-влак лектыт. Иктыже чылт йыгыт гай коеш: шем костюмым чиен, кидыштыже чевер пеледыш аршаш. «Мемнан деке садак пурен огыда керт, тошкалтышым чиялтыме. Кайык гай чоҥештен пураш шулдырда уке», - шоналтыш Зоя.

Изиш лиймеке, кӱвар йымалне йӱк-йӱан шоктыш. «Тиде мо томаша?» - аптыраныш ӱдыр. Пӧртыш ачаж ден аваже пурен шогальыч, почешышт - уна-влак. «Ӱдырем, ӱстелыш сийым пого», - каласыш ача. Зоя ден аваже содор гына ӱстелыш сийым темышт. Ава ик чайник кочывӱдымат лукто. Уна-влакат кондымо сийыштым ӱстелыш шындышт. Чылан ӱстел йыр погынен шинчыч. «Ме ӱдырдам марлан налаш толна», - увертарыш кугурак пӧръеҥже. «Ӱдырем ден качымарий келшат гын, ме тореш огына лий», - ешарыш ача. «Туге, туге», - ӱшандарыш аважат. «Ӱдырда тореш ок лий гын, ме тудым таче пеленна наҥгаена», - шоктыш темлаш толшо ӱдырамашын йӱкшӧ. «Йӧра, йӧра, айста ынде чайым йӱына, кочывӱдымат подылына - уке гын, пушыжо кая», - темла суртоза.

Тыге мутланен, жап писын эрта. Ик чайник, кокыт, кумыт… Кочывӱдымат йӱын пытарышт. Мурышт-куштышт, мӧҥгӧ каяш тарванышт. Ӱдыр веле нунын дене пырля каяш ок вашке. Качымарий Зоя воктек миен шогале. «Зоя, айда пырля каена», - ӱжеш тудо. «Мый кӱвар йымач марлан ом кай», - руале ӱдыр.

Саде кочывӱдетын куатше чылаштын вуйым сайынак аҥыртен: тошкалтышым чиялтыме нерген йӧршын монденыт. Тыге ӱдырым налаш толшо-влак, сийлан тауштен, шешке деч посна чиям тошкен лектын каят.

…Жап эртен. Зоя вес качылан марлан каен. Тудын пӱрымашыже весе лийын.

Изображение Igor Schubin с сайта Pixabay

Читайте нас:

Новости партнеров

1 ғинуарҙа саҡ үлемдән ҡалған

На уровне молекул

“Ана капиталы” акчасы калган иде

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».