Кок вуй ковышта

«Илыш шуко шӧрынан, айдемат тӱрлӧ вашлиялтеш, садланак илыш оҥай, ушеш кодеш, шинчаш перна, - ойлаш тӱҥале мӱндыр родем. - Ялыш илаш куснымек, юто-вусым нальым. Вет кызытсе саманыште комбым, лудым, кӱркам, чывым кеҥежым кажне ялыште шукын ашнат. Поснак бройлер чывым. А мо? Мыйын шонымаште, эн пайдале кайык. Писын кугемеш, чыла кочкеш: шудет, лашкат, шурно пырчет, пареҥгет, да 5-6 кило чиста шылже лектеш. Шкендын, а американ огыл! Экологически чиста шыл! Чыла велымат сай. Тиде «экологический продуктет» мыйым пошкудем дене изиш сыратен ыш пытаре. Пашаже тыге лие.

Шыже велеш, пареҥгым луктын пытарымек, пакча гыч ковыштамат пӱчкын пуртен пытарышым. Бройлер чывем-влакым, кодшо ковышта лышташым кочкышт манын, пакчаш пуртен колтышым. А шке, эркынлен, пӧртыш пурен, чайым йӱаш шинчым. Кенета «Галя да Галя!» кычкырыме йӱкым колам. «Мо лийын? Кӧ кычкыра?» манын, оралтыш лектым. Марпа пошкудем шога. Тургыжланыше тӱсан.

- Мо лие? - манам.

- Тыйын чывет-влак мыйын ковыштам кочкын пытарат ынде, поктен лук, - сырен ойла пошкудем.

Чывем-влак воктек мийышым, поктен луктым. Эрлашыжым адак пошкудем пурен, сырен ушештарыш вет:

- Чывет адак мыйын ковыштам чӱҥга, лук!

Муни-муни ошкылшо бройлерем-влакым адак поктышым. Тидым ужын шуктышо вес могыр пошкудем ойла:

- Марпа кок вуй ковыштажым тылат тӱкен ойлышаш верч гына ок пӱч вет. Чывыжат тудын каҥга, изи, кушкын огыт керт.

Шым ӱшане, но эрлашыжым, мешакеш ныл вуй ковыштам пыштен, Марпалан пуртышым.

- Нал, - манам, - кеч шинчалте, кеч тушитле. Кугу, пешкыде улыт. Компенсаций лиеш, тыглай пуэм.

- Уке, - малдалеш. - Мыйын шкемынат пакчаштем уло. Варарак пӱчкын пуртем. Чывет-влак гына кочкын огыт пытаре гын. Ок кӱл ковыштат.

Шыдем лекте, но, нимом пелештыде, мӧҥгеш нумал кайышым.

Икмыняр кече гыч адак Марпа пурен шуо.

- Пытарет ынде ковыштамым. Солянкым ыштем, шоненам ыле, солянкым кочде кодам ынде. Лук вашкерак чывет-влакым, - шурга.

Могай рожым муын пуреныт? Ала. Луктым, а шкеже шонем: «Пошкудем дене чывылан верч сырен илаш ок лий».

Эрлашыжым эррак лектымат, лу чывыге шӱшкылын, кӱрын, эрыктен, шӱлалташ печеш сакен кодышым. Кечат вет кугу, кӱжгӧ эрдан-влак, ончен, шинча куана, кызытак шолтен, жаритлен, паритлен кочмет шуэш.

Ик кум кече гыч Марпа оралтыш пуренат, йодеш:

- Галя, а Галя, чывет-влак кушто улыт?

- Шӱшкыльым, морозильникыште, - манам.

Марпа, «Э-э» манын, кидшым лупшалят, пакчашкыла ошкыльо. Мыят почешыже. Ончем, кок ковыштажымат шӱдырен луктат, шке чывыжлан шолыш: «Налза, кочса, темдыме-влак».

Илыш… Тыгеат лиеш улмаш.

Изображение Ulrike Leone с сайта Pixabay

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».