Тудо пытартыш ийлаште путешествийыш кошташ кумылаҥын. Корныш шукыж годым отпуск жапыште, поснак кеҥежым, тарвана. Тачысе кечылан Валера Российын тӱрлӧ сылне вер-шӧржым ончен савырнен. Крымыш тений кумшо ий почела миен. Тушто Судак гыч Евпаторий марте лийын - Ялта, Алушта, Алупка, Симеиз олалам ужын. Тусо историй нерген каласкалыше чыла гаяк полат ден замкыште лийын. Йот эл гыч январьыште Тайландыш чоҥештен толын. Байкал ерыште лиймыжат волгыдо шарнымашым коден. Ты гана у вер-шӧрыш унала кайымыж нерген кумылзак рвезе Севастополь ола гыч увертарыш.
Валерийын спорт дене пеҥгыде кылым кучымыжат илышым вес шинча дене ончен аклаш полша, очыни. Профессийже дене тудо физкультурым туныктышо улеш. Икмыняр ий Мишкан селасе 150-ше профучилищыште тренерлан ыштен. Кызыт Уфа олаште ила да «Технодинамика» заводышто ЧПУ станокын операторжылан ышта. Южгунам теннис дене спорт таҥасымашлаште вийжым терга, пашам ыштыме предприятийжын чапшым арала.