Копшаҥге

Ме шуко тӱрлӧ копшаҥгым палена. А пареҥге лышташым кочшыжо чонешак витарен шуктен. Лышташнер кояш веле тӱҥалеш, копшаҥге-влак помыжалтытат. Нунын дене, кӧ кузе кертеш, туге кучедалеш. Но Колорадо гыч толшо уна-влак шке элышт нерген шукертак монденыт. Мемнан кундемнам шке элыштланак шотлат ала мо - пеш чоя улыт.

Яллаште пакча ден пакча коклаште пече уке. Копшаҥге-влак лач тиде верыште илат. Тыште икте-весышт дене кечын вашлийыт, чон почын мутланат.

- Пошкудем, мо таче шӱлыкан коят? Ойгыраш амалат уке чай - пареҥге лышташ ситышын коеш, игече ояр, - мутым луктеш иктыже.

- Итат ойло, ынде кокымшо кече тиде верыш чоҥештен толам. Кушан лиеш, тушан малаш верештеш, - вашешта вес пакчаште илыше копшаҥге.

- Ала-мом ойлыштат.

- Ужат, Кансыле кувай, кидешыже атым кучен, пакчаш лекте. Тудо мемнам атышке пога, шер теммеш вурса, шӱведа, кок корно ушнымашке намиен кышкалеш.

- Молан тушко наҥгая?

- Мемнам пакча гыч покта. Ме тушеч кайышаш улына, манеш. Кушко каена вара? Моло вере пареҥге лышташым кочкаш ок лий, а тудын пакчаштыже, нӧргӧ лышташым пурыштын, шерат ок тем. - Трук ала-мом шарналтат, ойлаш тӱҥалеш: - Мый теҥгече черланенам ыле. Мо лийын кайыш, умылен ом керт. Ешем дене кече мучко мален эртарышна, каслан веле паремна.

Тыгодым пошкудо пакчаште йӱк-йӱан талышна. Копшаҥге-влак шоҥго ача ден эргыжын мутланымым колыт.

- Ачай, теҥгече кондымемым кушко шындышыч? - йодеш эргыже.

- Кастене пакчаш шавышым. Молгунамсе гаяк ведра вӱдеш лугышым, пакчалан ситарышым. Копшаҥге-влак йоген пытышт.

- Ачай, ончал, копшаҥгет-влак чылан куанен шинчат. Ынде нунынат вуйышт коршта, очыни. Мый нунылан аярым налаш монденам, а тылат «Тройной» одеколоным пуэнам ыле, тый умыленат шуктен отыл. Йӧра, таче нунылан аярым кондашак тыршем.

Тыгай мутым колын, ик копшаҥгыже чытыраш тӱҥалеш, а весыже куанен пелешта:

- Теве тыйын черет могай, таче вует чот пеҥеш улмаш.

- Вуй коржмым чыташ лиеш, а оза вес эмым конда гын, мыланна мучаш лиеш.

- Ит ойгыро, Кансыле кувайын пакчаже кугу, пареҥге лышташыже шуко.

Копшаҥге-влакын мутланымыштым колыштат да ӧрат веле. Унала толшо-влак паяр гай илат. Шке элышкышт каяшат огыт шоно. Кӧ нуным конден? Вет Колорадо марте моткоч мӱндыр. Кансыле кувайлан эргыже ола гыч эмым конда гын, нунылан мучаш лиеш, шонем. Но ала-молан, пошкудем-влак нуным тӱрлӧ йӧн дене пытараш тыршат гынат, сеҥен огыт керт. Ынде теве пакчаштымат ий еда иземдаш тӱҥальыч. Пагалыме пошкудем-влак, айста пырля копшаҥге-влакым мӧҥгышт ужатена.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».