У ийлан мыскара такмак-влак

Ах, пеш йӱштӧ, йӱштӧ пеш,

Таҥем кушто дыр коштеш.

Огеш тол гын кас велеш,

Весым муаш верештеш.

Пайремнажым вученам,

Пучымышым шолтенам.

Жапыште толын ок шу гын,

Сийлем Йӱштӧ Кугызам.

Ош тувырем - кеҥежлан,

Шем костюмем - пайремлан,

Тый вес таҥым муынат гын,

Мыйынат у - У ийлан.

Таҥет дене ит моктане,

Таҥет лач ик кечылан.

Тыгай йорга койыш дене

От му ИКТЫМ ӱмырлан.

Ой, йолташем-пелашем,

У ий дене саламлем.

Чыла кӧргӧ куштыратым

Выньык ден почкалтарем.

У ий касым пайремлаш,

Пурыш йолташ саламлаш.

Иктым йӱӧ, весымат…

Ыш саламле нигӧмат.

У ийлан ару лияш

Кайыш пелашем мончаш.

Вӱд печкежым путаен,

Йӱштыл лекте пӱрӧ ден.

Пайремнажым пайремлаш

Тачак кӱлеш тӱҥалаш.

Кум кече вет шагал огыл,

Кузе тынар жап тӱсаш?

«Ида йӱ» ман огына ман,

«Йӱза» манын огына ман.

У ий дене ик коркаже -

Таза лияш чылалан!