Пеледышышт ямле садым ушештара

Калтаса район Савакмарий ялеш шочын-кушшо ӱдыр-влак коктын кок тӱрлӧ профессийым налыныт (Светлана Благовещенск педколледж деч вара Бирск кугыжаныш педагогика академийыште тунем лектын, психологлан ышта. Людмила - Екатеринбург оласе Экономика, управлений да права институтын выпускницыже, финансист-экономист). Но ик оҥай хобби нуным чыла яра жапыштым пырля эртараш тарата. Ӱдыр-влак калыкыште утеплитель семын палыме изолон гыч сылне пеледышым ышташ кумылаҥыныт. Тидлан Светлана ден Людмилам Олан пайремыштыже ужмо оҥай кидпаша выставка таратен.

…Таче ӱдыр-влак кумшо ий усталык пашашт дене уло родо-шочшыштым, йолташыштым куандарат. Тиде жапыште изолон гыч пеледышым ыштыме техникым нуно сайынак шымлен шуктеныт. Кумылым нӧлтышӧ сылнылык тӱняштышт нуно йӱдшӧ-кечыже «илаш» тореш огытыл. «Ростовой» манме пеледышын кӱкшытшӧ 1,5 метрыш шуэш. Роза, шӧршудо, лилий-влак чонанла койыт. Пӧрт кӧргысӧ интерьерым сӧрастарыше оҥай арт-объектым ышташ ӱдыр-влак эн шагалже кок, эн шукыжо вич кече тыршат. Кызыт Людмилан суртышто лияш яра жапше шукырак, садлан ыштышаш сомылжо утларакшым тудлан «логалеш». Светлана пеледыш лышташым ямдыла гын, Людмила чыла ужашым иктыш уша, сӧрастара. Лепесток-влак кӱлеш семын савырнылышт манын, нуным, изолон гыч пӱчкедыме деч вара, строительный фен полшымо дене кадыртылман. Умбакыже клейым темыме пистолет дене пеледышыш чумырыман. Пеледышын вургыжо - металлопластик труба. Тудым пӱчкедаш, пеледышыш пижыкташ Людмилалан Тимур пелашыже полышкала. Подставке шотеш пу пӱчкышым йӧнештарат. Ужар тейп-ленте дене пӱтырымӧ деч ончыч Людмила пеледыш вургышто лышташлан верым ямдыла - кочаж деч кодшо вӱрж дене изи рожым ыштылеш.

Ӱдыр-влак утларакшым пӧлемым волгалтарыше пеледыш-светильникым ямдылат. Тидлан пеледыш лышташ-влакым изирак плафон йыр пижыктылыт. Светильниклан тыгак лампычкым, розеткым, кабельым, шнурым, переключательым да моло арверым наледыман. Изолоным ӱдыр-влак вес ола гыч интернет йӧн дене налыт. Светильникым сӧрал барби курчак семынат ыштылыт. «Тувыржым» могайым «чикташлан» модельерат лияш логалеш. Сомылышто колер ден перламутр эмальымат кучылташ тунем шуыныт. «Изолон гыч ыштыме пеледыш мыланна мо дене келша? Тудым, амырген гын, вӱдеш «йӱштылташ» лиеш - нимат ок лий. Чӱктымӧ годымат уто пушыжо уке. Курчак-светильникым ик касыште икте-кокытым ыштен ямдылена. Иктаж-кӧ дек унала тарванена гын, могай пӧлекым кучыктышашнам ончылгоч палат», - каласкалат ӱдыр-влак.

Усталыкым йодшо кид яра шинчаш ок йӧрате. Акаж ден шӱжарже Светлана ден Людмила крючок денат пидыт, йочасадыш коштшо ӱдырышт-влаклан канзаши техника денат мотор резинке-влакым ыштылыт. Икманаш, кумылым нӧлталаш мӱндырк кайыман огыл. Чонлан келшыше сомылым веле муын моштыман. А уло кумылым пыштен ыштыме пашан лектышыже эре куандарыше.