Чыве вуй

Тиде томаша кунам лиймым раш ом шарне. Май мучаште кум кечаш бройлер чывиге-влакым нальым. Кок арня тымык, леве игече шогыш. Чывиге-шамычат койын кугемыч. Пакча емыж росотамат сад-пакчаш луктын кусарышна.

Кок арня гыч игече кенета йӱкшеме. Паша гыч кечывал кочкышым ямдылаш пӧртылам. Кече ала-куш шылын йомо. Мардеж лекте. Кап-кыл сӱсаныш. Кече шичме велым шучко шемалге пыл толеш. Вигак пакчаш ошкыльым. Пакча емыжым петыркалаш полшаш Рая шешкымат толын шуо. Коктын пашам писын ворандарышна. Оралтыш лекна. Ончена, чыве чывигыже-влак дене, комбо, игыже-влакым вӱден, вӱташ пурен йомыч. Вӱта омсам петырен шуктышым веле - шолем йогаш тӱҥале. Тудо торн, сливе гай кугу - нимо ок кой. Рая шешкым дене пӧртӧнчык куржын пурышна. Шолем йогымым ончен шогена.

- Эх, вует, уш-акылет…, - тошкалтышыш волен шинчым.

- Мо лие, авай? - лӱдын йодо шешкым.

- Бройлер чивигем-влак? Ох-ох, шолем пытарен дыр нуным. Ушдымо!

Омсам почын, куржын лекнем ыле. Шешке ыш лук:

- Шке эмганынет мо? Тый чивиге-влаклан полшен от керт! Мо лийын, тудо лийын.

Чон вургыжеш, но нимом ышташ ок лий.

Шолем чарныш. Пыл-влакат эртышт. Кече ончале. Омсам почын, шолем ӱмбак шогалын, мунчалтен кайышым. Шуҥгалтым. Ночко презе гай почаҥам: ни кынелаш, ни шогалаш! Шешке, мыйым кынелтен, пӧртыш пураш полшыш.

- Ит вашке, шолем левыже, иземже, - лыпландарыш Рая шешкым.

Шолем левымеке, чыв-игым кычалаш лекна. Вӱтам, улак верлам ончен савырнышым - нигуштат уке улыт.

- Авай, авай, тол тышке! Урем капка воктене улам, - шешкын йӱкшӧ шоктыш.

- Ала кап-кылыштым муыч? - куржын мийышым.

- Кап-кылыштым огыл, шкеныштым муым! Чонан улыт!

- Кушто? - ӱшаныде вашкем воктекыже.

- А тый капка воктенсе пече ломаш йымаке, ӱлык, ончал.

Ончальым гын - мутем йомо… Тунар куанышым! Кузе нунын ушышт ситен?! Ломаш йымалне, кутышыж дене, коло чивиге почела шинчат! Ни нӧрен, ни лавырген огытыл, чонан улыт! Кӧ тидлан туныктен? Авашт уке. Юмо полшен? Латшым кечаш гына улыт вет. Теве тылат чыве вуй. Ӧрмаш!