Мокмыр

Шокшо кеҥеж. Колхозышто ӱден пытареныт, но эше паша шолын шогымо жап. Яллаште сабантуй-влакым тарватылыт.

- Таче меат колхозышто сабантуйым эртарена. Но эрла, игече сай лиеш гын, Йыванын тракторжо дене химпрополкыш лекташет верештеш. Пайремыште тылатат изиш окса премийым кучыктат. Пырля подылына, - манеш бригадир Мытрий тракторист Токтемырлан.

- Йӧра, пеш сай. Оксаже веле лийже, мом ыштышашым палена, - шыргыжалеш Токтемыр.

Чынак, тракторист-влак коклаште тудынат лӱмжым каласат. Сценыш куанен кӱза. А умбакыже кузе лийман? Бригадирым йӱктыде ок лий - тудо пашадарым «воза».

- Токтемыр, изишак подылына, но эрла, ояр кече лиеш гын, химпрополкыш лектатак, - ушештара бригадир пырля шинчылтмышт годым.

- Йӧра, эрлам огына ойло. Таче подылына. Кечын сабантуй ок лий, - вашешта трактористет.

Эрлашыжым эрденак бригадир Мытрий Токтемырын суртышкыжо толын пура. А тудыжын вуйжо коршта, шелеш, кровать гычат пыкше кынелеш.

- Айда, кынел, коч да пашаш кай. Теҥгече ойласен келшымына почеш химпрополкыш лекман, уке гын ты сомылым шукташ вараш кодына, - шӱда бригадир.

- Йӧра, - манын, оза чайым йӱын кодеш. Но пашаш ок кай.

Ик жап гыч бригадир уэш толын шуэш.

- Мий, мыйым гаражыште вучо. Чечас миен шуам, - Токтемыр бригадирым ужатен колта.

- Бригадир деч садак утлен от керт, - манеш Ташвика пелашыже. - Мий, аватын марла тувыржым чие, ош ялукшым пид да пареҥге пакчаш шӱкшудым сомылаш лек. Варарак корштышо вуетым тӧрлатем.

Токтемыр, ик ганат катманым кучыдымо еҥ, содор гына марий ватыла чиен, пакчаш лектынат шогалеш. Ташвикалан тидак веле кӱлеш. Ик жап гыч бригадир адак сырен пытен толын пура.

- Мытрий чӱчӱ, пелашемым ышда вашлий мо? Тудо шаҥгак пашаш кайыш, - чоян пелешта ӱдырамаш.

- Уке, тудо пашаште уке.

- Кудывечыш, пареҥге пакчаш лектын ончалза. Шылын ок кошт дыр?

- Мый пӧртыш пурымем годымак йырым-йыр ончальым. Пакчаште ават гына вуй нӧлталде тырша.

Ташвика семынже шыргыжал колта. Бригадир Мытрий, вуй сакен, пӧрт гыч лектын кая. Вот вет кузе. Мардеж виян, пеш виян, но мардеж деч арака виянрак - чыла кертеш.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».