Сӧснан «кас кочкышыжо»

Мый «Чолманым» шукертсек налам. Шуко мыскарам - чара комбо-влакын мӧҥгӧ пӧртылмышт, сӧсна-влакын шуко жап малымышт нерген - лудаш верештын. Мемнан ялыштат оҥай томаша лийын ыле.

Ӱткӱстӧ ялыште Лена акай ден Микаля курскай келшен илат. Коктын сурт сомылым пырля ворандарат. Йочашт-влак шудым, пум ямдылаш полшаш толыт. Ялыште сомыл шуко - чылажымат жапыштыже шуктыман.

Теве мончам уэмдаш кӱлеш, а тидлан пырням чодыраште пӱчман, кондыман, чоҥыман. «Кузе тиде паша-влакым шукташ?» - шонкала Лена акай. «Нойымыштлан» пӧръеҥ-влакым изиш подылташат кӱлеш. Шонен коштешат, ик кастене ик под наре апырам шолып лугалта. Тидын нерген Микаля курскай палыде кодеш. Пелашыже моторын шушо апыра йӱкым куанен колыштеш, умбакыже кузе лийшаш нерген шонкала: «Шӱртӧ мучаш вӱдшым пеш вияным ом нал гын, монча ышташланат ситен кодеш. Нойымыштлан кастене гына тӱрвешышт шӱралтем гын, лачеш толеш». Кастене тыге шонкален, ласкан мален колта.

Эрдене Лена акай автобус дене райрӱдыш каяш погына. Ялысе кевытыш чылажымат огыт кондо, сандене пудамат кычал кайыман. Микаля курскам колта гын, пудажлан окса ок сите. Лена акай сӧснам пукша да уремыш луктын колта. Сӧсна вӱтан ик лукышкыжо лугымо апыражым пуртен шында. Микаля курскай тидым ок уж.

Озавате автобус дене райрӱдыш лектын кая. Кече шокшо, Лена акайлан нояшыжат сита. Мӧҥгӧ пӧртылын, ушкалжым лӱштен, малаш возеш. Сӧснам Микаля курскай пукшен да вӱташ петырен.

Эрдене озавате сӧсналан кочкаш луктеш. Моло кече озам вашлийше сӧсна шыпак кия. Кастене пыштыме кочкышымат логалын огыл. Лена акай, лӱдын, пӧртыш куржын пура. «Тый теҥгече сӧсналан мом пукшышыч!?» - пелашыжым вурсаш тӱҥалеш. «Мый сӧсналан тыйын ямдылен кодыметым пукшышым», - вашешта Микаля. Коктын сӧсна йыр коштыт, сӧсна шып шӱлен кия - колен огыл. Каслан оралтыш лӱҥген лектеш, вӱдым йӱэш, вара уэш вӱташ пурен возеш.

Сӧсна дене мо лийын? Пошкудо-влакат вӱташ пурен ончалыт, мом каласаш огыт пале. Кастене Лена акай лугымыжым шарналта. Шылтыме верышкыже ончалеш - лугымыжо йомын. Тунам веле озавате кушан кодымыжым шарналта. Сӧсна вӱташ пурен ончалеш - лугымо атыже шӧрын кия. Вольык кас кочкышым шке муын. Лена акай вӱта гыч куржын лектешат, кӱзым кучен лекше Микаля курскайым пӧртыш вӱден пурта…

Тыге Лена акан шонымо пашаже шукталтын огыл. Мончам ышташ вес планым ямдылаш верештын. Мончам кеҥеж мучашлан чоҥен шуктеныт.