Машинам мо ылыжтен?

Ончем, ваштарешем механик писын ошкылеш, кидше дене вучалте маншыла ончыкта. Уждымыла койын, пӧртыл каяш ок лий вет - начальник. Воктекем толын шогале да ойла: «Эрла машинам техобслуживанийыш шогалте - мӱндыр корныш тарванаш ямдылаш кӱлеш, шкежат ямдылалт». Тыге лиймеке, шонем, машинам эрдене гына сайрак ончалам да мӧҥгӧ кайышым.

Эрдене, вашкыде, пашаш ошкыльым: медосмотрым эртышаш, путевкым налшаш уке. Гаражыш пурышым веле, «Сергей, мо вараш кодын толат?» шоктыш. «Машинам техобслуживанийыш шогалташ шӱдышт, куш вашкаш?» - вашештышым. «Чыла палем, машина сравочым мылам пу. Шкеже Арлан базыш шофердымо машинам виктараш путевкым нал. Шофержо вес тӱняш каен, а машина пашам ыштышаш». Тыгай уверым колмеке, ӧрынрак путевкым налын, гараж гыч пашаш лектын кудальым. Снабженец дене Шушнур нефтепаркыш материалым наҥгайышна. Ястарен, мӧҥгеш тарванышнат, ик жап гыч мотор трук йӧрыш, машина чарныш. Молан тыге сай ыштыше моторын кенета чарнымын амалжым кычалам. Икманаш, бензинат, сескемат уло, а машина ок тарване.

Коло ий утла шофер пашам шуктенам. Могай гына случай лийын огыл, но машинам икымше гана ачален ом керт. Гаражысе моло шофер-влакат ушнышт, каҥашым пуэдат, полшат, амалжым кычалына, но дыр-дыр манмет уке. Толашен-толашен, аккумуляторат шинче.

Буксир дене моторым ылыжташ тӧчышна, но шот ыш лек. Полшышо йолташ-шамыч, ӧрын, «Механик деке йыҥгырте, мо лиймым умылтаре» манын шаланышт. Капотым шоп петырышымат, кабиныш пурен шинчын, сигаретым пижыктышым, йӱлышӧ шырпым пуал йӧртышым. «Эх, Сергей, кузе тыге проста ЗИЛ машинам ылыжтен шыч керт, моторын экшыкшым шыч му? Йӧра, кызытсе электроника, куштыжо компьютер кӱлеш, лиеш ыле гын…» - шонкалем шке семынем.

Кенета ушышкем ончычсо машина озалан сортам чӱкташ шонымаш толын пурыш. Ик шырпе пырчым луктын, удыралын ылыжтышымат, шоферын лӱмжым каласен, моштымем семын чоклен нальым. Пытартышлан «Мыйын титакем уке, тыйын машинаш механик шындыш. Ит шыдешке, тиде тыйын пашат, очыни» маньым. Тамакым шупшын пытарышымат, зажиганий сравочым пӱтыральым веле, шичше аккумулятор «помыжалте», стартерым пӧрдыкташ тӱҥале! Мотор ылыже. Ӱшанеда гынат, уке гынат, илышыште тыгеат лиеш улмаш.