«Пӱгырненрак» кушталте!

Тудет унам весела кумыл дене вашлие. Ӱстелтӧрыш шинчын, шер теммеш мутланышт. «Сергуш, рвезе годсо жапым шарнет мо? Ме ик пайремымат Васли Кугыза лийын лекде ышна код. Тунам калыкшат весела ыле - гармоньым шоктен, куштен, сурт еда коштынна. А вет иктат, ынышт кошт манын, омсам тӱкылен огыл. Тыят пеш весела ыльыч, шарнет? Ик гана, коҥга гыч луктын, помышышкет шокшо киндым шолып чыкенат да тӧрштен-тӧрштен куштенат. Ой, кузе шокшо ыле тылат тунам, чыте веле!

Озавате тылат, пеш шокшо гын, пӱгырненрак кушто манын ойлен. Тудыжо коҥга гыч киндым шолыштметым паленат огыл. А вара саде шокшо киндым уремыште чылан пӧлен кочкынна. Рвезе жап - чулым пагыт. Но, чаманаш логалеш, ок пӧртыл. Йӧра, кеч чыла вере шуылтын, пайремым веселан эртаренна. Шоҥгемаш тӱҥалмеке гына умылет чылажымат! Эх, мо эртен, шарнаш веле кодо», - шӱлалтыш Сергуш коча.