Мытрийын кочкышыжо

Унавика кокай, ялыште Гали ӓви маныт, кастене шинчаш толынат, мемнан дене илышыштыже икымше гана пельменьым тамлен ончен. Тудлан тиде кочкыш тунар чот келшен! (Мут толмашеш каласен кодем, чынак, ачамын пельменьже тамле ыле.) Кас шинчаш толмо годым совла дене кум гана налын тамлыман да «Тау, рахмат» манын лекман вет. Унавика кокай ӱстел коклаштак у кочкышым кузе ыштымым, мом ешарымым (кызытсе йылме дене ойлаш гын, ингредиентшым да технологийжым) йодышт налын. Но мыняр жап шолтымым рашемдаш монден, лач авамын, Алепан, шолшо вӱдыш пельменьым пыштымыжым да налмыжым ужын. Пӧртылын, малаш вочмекыжат, тамле пельменьым ыштен, теммешкак кочкын ончаш шонымаш вуйжо гыч лектын огыл.

Эр сомылжым тӧрлатен, чыла ойлымым шарналтен, шылым пӱчкеден ямдылен да Мытрий дек мясорубкылан Езбика ӱдыржым куржыктен. Тудыжо куанен куржын, пален, мясорубкын озаже сомыл дене мийыше кажне йочалан киндеш мӱйым шӱрен пуа. Садлан Мытрий чӱчӱ дек сомыл дене мияш акаж дене коктын чӱчкыдын чеҥгесат улмаш. Мӱян киндым кӧн кочмыжо ок шу?

Йӧра, ӱдыржӧ мясорубкым намиен. Шылым тӱеныт, пельменьым ыштеныт, кӱктен, чеслынак кочкын шынденыт. Тамле кочкыш деч вара, изишак шыҥыже манын, Унавика кокай каналташ возын. «Да, пала Мытрий мом да кузе ыштен кочшашым. Молодец пӧръеҥ», - шоналтен семынже. Ик пел шагат гыч молан дыр мӱшкырым пӱтыраш тӱҥалын вет. Эй, урлен, эй, кычкырен - пуйто четлыкыш петырен шындыме янлык эрыкыш лекнеже улмаш. Кокай шижын, кугыжан йолын коштмо верыш писын гына миен ок шу гын, азап паша лийын кертеш. Такшым тудо мардеж гай писе ӱдырамаш ыле: урем дене эртен гын, почешыже пурак нӧлталалтын. Миен шуын! Йӧра, изишак лыпланен, но икмыняр жап гыч кокымшо, вара кумшо гана куржаш верештын. «Молан тыге? Мо лийын кайыш?» - шонен. Умылен, амалже - пельмень!

Ярнымек, пошкудыж дек эмлан пурен, тыге умылтарен: «Мытрийын кочкышыжым кочкынам ыле («Пельмень» мутшым монден.), садлан тыге лийым».

Тылеч вара кокай пельменьым кочкын але уке, ом пале, но «Мытрийын кочкышыжо» шомак ятыр жаплан «пельмень» мутым алмаштен. А кызыт кевытыште могай гына пельмень уке - шинчат шалана, но пӧртыштӧ шке кид дене ямдылымыже садак эн тутло!