+28 °С
Облачно
Калык йӱла
23 Мая , 08:34
Пайдале кушкыл
Тидым кугезына-влакат сайын паленыт да шошо еда тӱрлӧ кушкыл гыч могай-гынат кочкышым ямдыленыт. Мыйын Пайрамсуло ковамат шошо еда полдыран, середа да нуж дене шӱрым шолта, ужар шоган, шинчаланшудо когыльым ышта ыле. А ӱлыл (ялнан ӱлыл мучаштыже илыше) кувавам, авамын аваже, полдыраным изи пакчашкыже конден шынден. Коклан, корем воктен полдыраным кычал коштмеш, тыгыде кудыр лышташыже-влакым Ольга ковамын пакчаштыже кӱрын толынна. Кугурак-влак дене пырля иктаж сомыл дене олыкышто, пӱртӱс лоҥгаште коштмо годым мыланна, изирак йоча-влаклан, шинчаланшудо, юа кушто кушмымат ончыктеныт. Мый гын шошым пошкудо икшыве-влак дене пырля олыкыш серний погаш коштмынам, вара тудым уло ешге кинде дене шинчалеш тушкен кочмынам кызытат порын шарналтем. Кугезына-влакын йӱлаштым шуктен, кызытат шуко еҥ ужар кушкыл гыч тӱрлӧ кочкышым ямдыла. Шукыштын лач шкеныштын гына посна рецептыштат уло.
Изображение сгенерировано нейросетью.
Шинчаланшудо салат
100 г шинчаланшудо, 2 кияр, 2 муно, ужар шоган, укроп, 2 совла ӱмбал, шинчал, пурыс кӱлыт.
Пӱтынь кӱйшӧ муным, эрыктен, 4-6 ужашлан пӱчман, мушмо шинчаланшудым (пеҥгыде вургыжым пӱчкын шолыман), ужар шоганым, укропым тыгыдын, киярым кужакан пӱчкедыман да, келшыше атыш пыштен, шинчалым да пурысым шавалтыме ӱмбал дене йӧрыман.
Тыгаяк рецепт почеш вес таманрак салатымат ышташ, шинчаланшудо олмеш юам - ир чеснокым - ешараш лиеш.
Нуж шӱрӧ
3-4 пареҥге, 1 вуй шоган, 1 кешыр, нӧргӧ нуж, 2 совла кушкыл ӱй, шинчал, пурыс, ужар шоган кӱлыт.
Шолшо вӱдыш пыштыме пареҥгым 15 минут кӱктымек, тушкак салмаш жаритлыме кешыр ден шоганым, шокшо вӱд дене шӱялтыме, тыгыдемдыме нужым ешарыман да эше вич минут шолтыман. Нужын тамже аралалт кодшо манын, лемым мучаште гына шинчалтыман да пурысым шавалтыман. Тулым йӧртен, иктаж лу минут наре вучалтымек, лемыш ужар шоганым шавалтен, тамлен ончашат лиеш.
Нуж шӱрӧ тутлырак лийже манын, лемыш изишак тар але моло шӱрашым ешараш, мучашлан кӱчымӧ муным лугалташ да ӱмбалым пыштен кочкаш лиеш.