Андриобед але андригочкыш

Андриобед але андригочкыш - тиде кечывал ден кас кочкыш коклаште, иктаж 16 шагат годым, изиш пурыштмо жап. Лӱмжӧ апостол Андрей Первозванный дене кылдалтын. Андрей Первозванный лӱмеш пайремым 13 декабрьыште эртарат, а тиде - постым кучымо жап. Тынеш пурышо-влаклан кече вузалмек гына (16 - 17 шагат гутлаште) пайрем кочкышым ышташ лиеш. Марий-влак коклаштат тынеш пурышо еҥ ятыр лийын. Нунат тиде жапыште гына кочкаш шинчын кертыныт, садлан ты йӱла дене кылдалтше кочкыш жапымат «андриобед» але «андригочкыш» маныныт. Илен-толын, тиде жапым кеҥежымат «андриобед» але «андригочкыш» манаш тӱҥалыныт. Тыге полдник жап андриобедыш савырнен. Теве тыгай кӱчык историй.

Маядыкыште андриобед дене кылдалтше ик оҥай шомак уло. Тудым тӱҥалтыш класс-влакым да марий йылмым туныктышо ойлен ыле, а тудлан аваже каласкален.

...Согыш жапыште, иктаж июнь мучаште але июль тӱҥалтыштырак чыла ял калык изижге-кугужге олыкыш колхоз вольыклан шудым погаш лектын. Колхоз кечывал кочкышым да андригочкышым ямдылен. Шӱрӧ шолташ ложаш лем токрак лийже манын, колым кученыт, ракывот шылым, юам, шинчаланшудым, полдыраным ямдыленыт. Тидлан лӱмын кум-ныл еҥым коденыт. А чайыш шоптыр лышташым, матрушкам, мӧрым оптен тамлештареныт. Бригадир кочкаш шолтышылан лӱмын ик ӱдырамашым шогалтен. Тудлан черет дене ик ӱдыр да ик рвезе полышкаленыт. Теве Андрий Егоровланат полшаш черет шуын. 14-15 ияшрак рвезе мӱндырч ойлымым начарынрак колын. Поварын тудлан «Еҥ-влакым андриобедыш, мӧран, шоптыран чай йӱаш ӱж» манмыжым ала колын шуктен огыл, ала тудым йодыт манын шонен, олык сыртыш кӱзенат, «андри» мутшым кудалтен кычкыралын: «Обед, обедыш толза!» «Андриобед мо?» - йодыныт толшет-влак. Тидын деч вара мемнан велне ты жапым эре «андриобед» манаш тӱҥалыныт.