Пушто - тамле марий кочкыш

Самырыкрак-влак тиде кочкышым мондаш тӱҥалыныт, южышт огытат пале, «Мо вара тудо?» манын вел йодыт. А шоҥгырак-влак тудын нерген тӱрлым каласкален кертыт.

Пуштым ышташ пушто ложаш кӱлеш. Тӱҥ ингредиентше - шыдаҥ. Ложашым ышташ шкалан кӱлеш наррак шыдаҥым налман. Шӱкшак деч эрыктыман, мушман. Келшыше кӱжгӧ пырдыжан каструльыш але чойн казаныш пыштыман. Вӱдым ситышын темыман (пырче деч ик ныл парня наре шукырак лийшаш) да изирак тулыш шындыман. Шолтымо годым шыдаҥ чот лӧча. Пундашыже ынже когарге манын, жапын-жапын пудыраташ кӱлеш. Озавате ямде улмыжым тӱжвал тӱс дене рашемда: шыдаҥ овара да пушкыдемеш. Эше ик гана вӱд дене мушкаш гын, сайрак лиеш. Варажым шурным шӱрыман. Вӱдшӧ йоген пытыже манын, дуршлагым але кугу сеткан атым кучылташ лиеш. Вӱд йоген пытымеке, шыдаҥым коштыман. Кеҥежым кечыште, а телым духовкышто але сушилкыште савыркален-савыркален коштат. Шыдаҥ сайын кошкышаш. Пеҥгыде огеш лий гын, йоҥышташ йӧсӧ але огешак лий.

Умбакыже кидвакш полшымо дене пырчым ложашыш савырыман - йоҥыштыман (Ожно, кидвакш лийын огыл гын, шуареш ыштеныт). Шокте дене шӱраш ден ложашым ойырыман. Шӱрашыжым, чылажат ложашыш савырнымеш, уэш-пачаш йоҥыштыман. Ложашыже пушто ложаш лиеш. Тудым вес семынже полто маныт. 

Пушто ложаш дене шокшо да йӱштӧ кочкышым ямдыленыт. Икымшыже - пуштым шолтымаш, овартымаш. Тидлан изи каструлеш але салмаш вӱдым шолаш пуртыман. Изишак шӱшмӱйым да ик чывыштыш шинчалым тамлен ешарыман. Пушто ложашым луген, изиш жаритлыме гай ыштыман. Ложашыжым шагалрак пыштет гын, пучымыш гай лиеш, шукырак пыштет гын, шӱштыра пуштым, кидыш налаш йӧнанрак лийже манын, ӱяча гай чумыраш але совла денат кочкаш лиеш.

Южгунам, утларакше кеҥежым, йӱштӧ пуштым ямдылат. Тидлан пушто ложашым торыкеш але шолтен йӱкшыктымӧ вӱдеш лугалтат. Торык дене ыштымыжым «пушто лапаш», вӱд дене ыштымыжым «йӱштӧ пушто» маныт. 

Ме тений пушто ложашым «Надира» сорт шыдаҥ гыч ямдылышна (ӱмбалже йошкар тӱсан, кӧргыжӧ - фиолетовый). Пуштыжо пеш тамле. Йоча жапым шарныкта. Тыландат ожсо марий кочкышым ямдылаш темлем. Кочкышда чесле лийже!