Самовар, мелна да сай кумыл

Чонлан лишыл, ямле пайрем чыла еҥын кумылжым нӧлтыш. Сценыште, акрет годсо да кызытсе самовар-влакым поген, кугу выставкым ямдыленыт. Районысо ялла гыч мийыше куд самодеятельный коллектив шке мастарлыкшым ончыктыш. 

Тыште пайрем веселан, самовар, мелна, сӧрастарыме ӱстеллаште моло сий-кочкыш, ояр кече дене эртыш. Тыгак мурымаш-куштымаш, модыш, самовар нерген шуко почеламут лийыныт - культура пӧртын пашаеҥже-влак оҥай программым ямдыленыт. 

Яндар южышто модмаш да куштымаш аппетитым почеш. Ты кечын чыла еҥым пайремын тӱҥ сийже - шолын шогышо чевер ший самовар гыч тӱрлӧ шудым ешарыме тутло пушан чай дене сийлышт. Самоварым ожсекак ешыште унам вашлиймын да улан илышын символжылан шотленыт. Ӱстеллаште могай гына сий лийын огыл?! Тӱрлӧ когыльо, мӱй, мелна, палыш, подышто кӱктымӧ плов, кол да молат. Ты кечын вашкерак самоварым ылыжтыме, келшымаш, самовар нерген такмак да муро конкурс-влакымат эртарышт.

Пайремыш Туймаза район администрацийын культура пӧлкажым вуйлатыше Рамзин Абсалямов, Николаевский ялсоветын вуйлыкшо Фанис Хуснутдинов, «Кандры-Куль» пӱртӱс паркын экологий шотышто методистше Ирина Сабирова миеныт. Нуно тыгай йӱлам арален кодымын кӱлешлыкшым палемдышт да чылалан сай кумылым тыланышт. БСТ телеканалысе интерактивный передача-влакын вуйлатышышт, палыме вӱдышӧ, Башкир-влакын Тӱнямбал курултайыштын исполком председательжын алмаштышыже Наиль Юнусовын поро ойжо, шочмо-кушмо кундемын культурыжым пагален ойлымыжо поснак чот кумылым нӧлтале. 

Ме Туймаза район дене пошкудо улына, садлан марла мурен куштымаш-влакым пошкудо татар калык рӱж совым кырен вашлие. Кузе от куане?! Ик мландым куралыт, ик шурным куштат, пырля келшен илат пошкырт, татар да марий калыкна. Келшен илымаш - мемнан кугу поянлыкна!