Марийлан 7 мом ончыкта?

Эше арняште шым кече уло.

Кумалме сомылат чӱчкыдын шымыт дене кылдалтын. Ты йӱлам эртараш ӱстелым шым ошкыл коклаш вераҥдат. Тӱрлӧ материал дене ыштыме ӱстел-влакеш шым тӱрлӧ Юмылан пуат.

Уштымо кече-влак гыч иктыже шымше кечын эртаралтеш. 

Тылеч посна шымыт «кугу торалыкым» ончыкта. Мутлан, ӱдыр налаш толшо-влак тыге ойлат: «Мӱндыр вер гыч, шым чодыра гоч толна». Сӱаныште оръеҥ деч качымарийлан шым ӱдырым да шым эргым ышташ тыланат.

Йӱлам шуктымо годым (шӱведымаш да моло) шымытан числа-влакым (7, 77 але 777) кучылтыт. Мутлан, локтымо але юлымо годым йӧсын ышташ лийме але йӧршын шуктен кертдыме паша нерген ойлат: «...77 тӱрлӧ кайыкым 77 тӱрлӧ кочкыш дене пукшен кертеш гын, тунам иже...»

Калык ойпогышто тыгаят уло. У тылзе шочмо годым, тудым ончен, ик тын (ик шӱлыш) дене шым гана «Тылзылан тичмашлыкым, мыланем тазалыкым йодам» манын ойлат. Але йӱдым каваш ончымо годым «Шоктешӱдыр - шым шӱдыр, шым гана савыралтен каласем гын, суап лиеш» маныт.