Кон кечын ик пашаже - коҥгам ошемдымаш

Ожно коҥгам ошемдаш кӱвӱдым ямдыленыт. Тидлан кеҥежым поран (известковый) кӱм погеныт да кукшо верыш аралаш пыштеныт. Кӱвӱд кӱлмӧ годым кӱм монча коҥгаш йошкаргымеш ырыктеныт да вӱдан атыш оптеныт. Тидлан мемнан-влак тошто подым кучылтыт ыле. Вӱд шолын да ошемын - кӱ гыч пор лектын. Йӱкшымекыже, вӱд шунден, ӱмбалсе артык вӱдшым изиш кышкалыныт да лугеныт (кӱжӧ эзылен пытен лиеш). Кодшо кӱжым калай шокте дене шӱреныт, пудыргыжо-влакым кышкалыныт. Ты вӱдым ош порвӱд, але коҥга порвӱд маныныт. Варарак коҥга ошемдаш ош эмульсийым кучылташ тӱҥальыч. 

Коҥга чиялташ сай кистычке кӱлеш. Тидлан мераҥ чапам кучылтыныт. Тудым верысе сонарзе деч налыныт. Тидын нерген тыгай историйымат колынам.

 Ик гана Патема (Николай Самлеевын коваже) Меҥлиян ӱдыржым кочай дек (тудо тале сонарзе лийын) мераҥ чапалан колтен. Кочай мераҥым шуко кучен, садлан эре мераҥ чапаже лийын. 

Меҥлиян толешат, ойла: 

- Мераҥ павай, мый Йогор чапалан тольым, ала уло?

- Уло, ӱдырем, уло, кокыт. Тольык мыйын чапам шкаланем кӱлеш вет. Можыч, мераҥ чапа кӱлеш? 

- Эй-ла, Йогор павай, йоҥыленам. Мӧҥгешла каласынем - мераҥ чапа маннем ыле. Ида сыре.

Кочай, воштыл-воштыл, Меҥлиянлан мераҥ чапам пуэн колтен.