Черым «йоктарен колтат»

Кузе тудым шуктат? Шошым Вичыште ий кайыме годым калык курык воктек погына. Такше тиде нимогай курык огыл, кӱкшака сер. Тушеч Вичыште ий кайыме сайын коеш. Ты сӱретым ончымо жапыште кажныже урвалтыжым рӱзалтен пелешта (ӱдырамаш-влак - тувыр урвалтым, пӧръеҥ-влак - курткыным): «Вӱд Ава, Вӱд Ача, Виче Оза, кузе Вичӱмбал ийдам йоктарен колтеда, Вичым эрыктеда, тугак ий дене пырля мыйын черемымат наҥгайыза, паремдыза. Ойлымем кавыл лийже». Тыге кум гана ыштыман. 

Шоналташ гын, тиде марий калыкын сакральный философийжын ик ужашыже. Калык шке кӧргӧ вийже дене палыдыме чержым паремден. Наукышто тидым аутогенный пареммаш маныт - еҥ шкенжын шижмашыж дене паремеш. 

Самырык-влак тиде йӱлам пешыжак огыт пале. Каласкалемат, «Кувавай ойла ыле шол» маныт. Мыйым тидлан ватемын аваже, Сарбина авай, туныктен ыле, а тудлан коваже ойлен коден.

Тений Виче ончыч тарваныш, садлан калык, курык воктек миен, тиде йӱлам ончычрак эртарыш. Таза-эсен лийза, ида черлане. Чердам ий дене пастырен колтыза.