Шорыкйол - калык йӱлам аралыше кыл

Мемнан ялыште Шорыкйолын клубышто модын ончыктымо тӱҥ ужашыжым шкенан «Калык сем» ансамбль дене пырля эртарышна. Йоча-влакат (Нунылан пайрем пеш оҥай чучын.), кугырак-влакым ончен, Шорыкйоллан келыштарыме вургемым чиен миеныт. Могай гына воштылчык сценка, тӱрлӧ модыш, конкурс, мурымаш-куштымаш лийын огытыл! А мужедше-влак! Нуным ончен да колыштын, мутыштлан чынак ӱшанаш тӱҥалат! Тошто У ий кож йыр Васлий кугыза дене пырля чылан пӧрдын-пӧрдын куштеныт. Мутлан, теве ик мужедышыже: кӱмыж кӧргысӧ шурнеш тыгыде оксам, шергашым пыштеныт. Кӧлан мо лектеш - илыш сугыньышт тугай лиеш. А вара Васлий кугыза ден Кувай-влак уремыш погынен каеныт. Кажне суртыш пуреныт, поян илышым тыланен, шурным кышкен коденыт, куштен-мурен чеверласеныт.