Нерге клубышто - кидпаша кече

Л.Я. Иванаева кидпашан историйже нерген ойлыш да примерлан арвер-влакым ончыктыльо. Ойлымыж гыч шуко у мутым пален нална. Теве ме «пу гыч пӱчкедымаш» манына, а ынде «карвинг» маныт, энкаустика - утюг дене сӱретлымаш, айрис фолдинг - тӱрлӧ тӱсан кагаз дене пашам ыштымаш, ошибана - пеледыш да лышташ-влак гыч картиным «сӱретлымаш».

Вара Д.С. Александрова шкенжын кидпашалан кузе тунеммыж нерген каласкалыш. Дина Саликаевна школышто пашам ыштымыж годым машина дене ургаш туныктымо кружокым намия ыле. Кызыт ансамбльлан ӓкӓйым, такиям, согам сӧрастара. Тудын Арина уныкажат коваж деч кидпашалан тунемеш, шырча дене тӱрлӧ арверым ыштылеш. Д.С. Александрова ӱдыр-влаклан мастер-классым эртарыш.

Мыйымат кидпашамым намияш йодыныт ыле. Мый кузе пидаш тунеммем нерген ойлышым. Икымше туныктышем Н.Г. Исаева крючоклаш, Люба акам машина дене ургаш да выкройкым ышташ туныктеныт. Ме, Памаш ялысе ӱдыр-влак, погынен шинчын, кидпашам ышташ йӧратенна.

Нерге школыш пашаш толмекем, сулен налме канышыш лекмешкак, кидпаша кружокым вӱдышым. Библиотекарь Лиана Иванаева мылам пидаш туныктымемлан таум каласыш да икымше гана пидме салфеткыжым ончыктыш.

Ты пайрем чылалан келшен, йоча-влакымат кидпашалан кумылаҥден.