Кайык-влак деч сай шурно лектышым йодна

Ожно еҥ-влак шошым шемгорак-влак шулдыр мучашешышт кондат манын шотленыт. Эр шошым изэҥер-влак йогаш да шокшо эл гыч кайык-влак чоҥештен толаш тӱҥалмеке, нунын лӱмеш «Шемгоракын пучымышыжо» пайремым тарватеныт. Тыгай йӱлам ӱдаш лекме деч ончыч пасулаште поян шурно шочшо, кайык-влакым пукшаш, шке деке савыраш манын эртареныт. Тиде кечын, калык вургемым чиен, уремыш лекман, мурыман, куштыман, калык модыш дене модман, веселитлыман. Йӱла дене келшышын, пушеҥге ден вондерлаш тӱрлӧ тӱсан тасмам кылденыт. Йоча-влакым моторын чиктен, нуным кажне сурт гыч шӱрашым, шӧрым, ӱйым, сакырым, муным погаш колтеныт, почеламут да муро полшымо дене калыкым пайремлаш ӱжыныт.

…Йочасадысе изи икшыве-влакат уло кумылын веселитлышт. Халима кова ден Гульназира уныкаже пайремын символжым - тамле пучымышым - шолтышт. Тудын икымше ужашыжым мландылан, кокымшыжым вӱдлан, кумшыжым кавалан, а нылымшыжым, шошым кондымыжлан тауштен, шемгорак-влаклан шеледышна. Тылеч вара пучымыш дене пайремыш толшо чыла унам сийлышна. Изи йоча-влак, вуй ӱмбалне тыныс илышым да поян шурным тыланен, кайык-влаклан пучымышым оптышт. Нунышт кужун ышт вучыкто: йоча-влак шаланыме годым тӱшка дене пучымыш деке чоҥештен тольыч да тамлаш пижыч.