Пушто - мондалт толшо кочкыш

Пушто ложашым ышташ пасуэш шыдаҥым кушташ кӱлеш. Шошым тудым куралме аҥаш ӱдат. Ужар озым, шытен лекмек, атыланен кушкеш да шыдаҥ вуйыш савырна. Уржа-сорла годым тудым комбайн дене тӱредыт, шийыт да пырчыш савырат.

Ожно, кодшо курымын кудлымшо ийлаштыже, мыйын 70 ияш шоҥго кувавам мыланна, изи-влаклан, пу кӱмыжеш пуштым луген, изиш шинчалым, ушкал ӱйым ешарен пукша ыле. Чылаланна иктӧр логалже манын, кормыжеш налын шалатен. Пушто тамже кызытат умшаштем.

Вич ий ончыч мыят пуштым ышташ шонен пыштышым. Ик ведра шыдаҥ пырчым  мушкым, кудывечеш кугу подеш пеле кӱймешкыже (шаланымеш огыл) шолтышым. Вара угыч мушкым да шокшо кече годым, оралтеш куэмым шалатен, шурчыктен коштышым. Игече начар годым коҥгаш кошташ лиеш. Ожно тыгай шыдаҥым кидвакш дене йоҥыштеныт, а ынде электрический вакш гоч кок гана колтен, ложашыш савырат. 

Кузе вара шолтат? Изиш шокшо вӱдым налман, тушко шинчалым, ушкал ӱйым левыктен пыштыман да ложашым лугыман. Эше торык да кефир дене йӧраш лиеш. 

Пушто - организмлан кӱлешан, пайдале кочкыш. Тушто мыланна кӱлешан А, В, Е, К витамин-влак улыт. Пуштым кочмо деч вара кужаш от шужо. Дина пошкудем шудо солаш коштмыж нерген каласкалыш. Ожно ӱдырамаш-влак калныкеш торыкым да пушто ложашым намиеныт. Кечываллан торыкеш ложашым луген кочкыныт, тыге вийышт ешаралтын, да кас марте шудым соленыт. Пуштышто лецитин витамин уло. Организмыште лецитин шагал годым еҥ вашке ноя. 

Мыят ямдылыме пушто ложашем гыч пучымышым шолтен ямдылышым да пайремыш погынышо-влакым сийлышым. «Теве, уныкам да пошкудем-влак, умылышда, пушто, кочкышыш савырнымешкыже, могай кужу корным эрта. Кочса-кочса, таза лийза! Шкеат мӧҥгыштыда ыштен ончыза. Арамлан огыл ожно «Пуштым кочкат - мӱшкырет ток лиеш» маныныт».