Тумерсолаште УГИНДЕ пайрем

Пайремнам поро тыланымаш дене ялысе онаеҥ Е.Н. Шипаев почо. Умбакыже «Йогын вӱд» фольклор ансамбль «Тичмаш кинде» постановкым ончыктыш да сылне мурыж-влак дене куандарыш. Тиде ансамбль ялыштына тарватыме кеч-могай пайрем годым тӱҥ сомылым шке вачӱмбакыже налеш. Участник-влак чылан суртан-печан, ешан, вольыкан улыт гынат, пагытым муаш да чыла ыштен шукташ тыршат. Тидлан нунылан кугу деч кугу тау. Библиотека вуйлатыше Е. Каримова кинде нерген возымо книга-влак нерген каласкалыш. Мемнан ялсовет мландыште, пырчым ӱден, шурным ончен куштышо пасу пашаеҥ-влакымат палемдышна да нунылан сай лектышым тыланышна.

Ожно тиде пайрем годым пошкудо-влакым пучымыш кочкаш погеныт. Меат кугу под дене шылан пучымышым шолтышна да чыла толшо калыкым пучымыш да самовареш шолтымо шокшо чай дене сийлышна. 

Унана-влак шкештат тӱрлӧ кинде кочкышым кӱэшт конденыт ыле. Мастарлыкыштым аклен, Эшмет ял гыч Н.К. Тимирбаевалан «Ӱдыр ӱппунем» каравайжылан икымше, Л.В. Демидовалан «Шурнывуй» когыльыжлан кокымшо, Л.В. Валишиналан «Кечшудо» когыльыжлан кумшо верым пуышна. Кочкышым кондышо кажне еҥлан изирак пӧлекым кучыктышна. Йоча-влакымат ӧрдыжеш ышна кодо - нуныланат модыш-влакым эртарышна, пучымыш да чай дене сийлышна.

Марий пайрем нигунам «Кандырам» куштыда ок эрте, мемнан унана-влакат шуко гана шогалын тавалтышт да, куштылго, ару чон дене кугу таум каласен, мӧҥгӧ ошкыльыч…

Арамлан огыл ойлат: «Кинде  лиеш - мурат лектеш», «Кинде уло гын, чылажат сай лиеш». Меат Угинде кечым сайын эртараш тыршышна. Спонсор семын полшышо Евгений ден Владимир Шипаевмытлан, моло полышкалышына-влаклан таум ойлена да пеҥгыде тазалыкым, кужу, пиалан ӱмырым, тӱнямбалсе да ялысе калыкланна ончыкыжат тыныс илышым тыланен кодына. Вес ийынат у шурно сайын ума манын ӱшанена.