Шудым солен от мошто гын…

Илыш вашталтме семын айдемын койыш-шоктышыжат вестӱрлемын толеш. Пашам иктешлыме, тудын лектышыжлан куанен, пырля пайремлыме йӱла тоштемын маншыжат уло. Ожно…  А молан ожно манына?

Йыдалым курым утла ожно чиен коштыныт,  а теве пашам  чумыр вий дене погынен ыштымаш эше шукерте огыл лийын. Савам кучен, кид дене солымымат эше монден огынал. Конешне, кызытсе илышыште бензо-электрокосилка  манмет-влак дене утларак пайдаланаш тӱҥалыныт. Но шке пакчаштышт, олыкыштат шудым тымартеат сава дене солышо-влак улыт. Тазалыклан пайдале, маныт. Пеш сай физзарядка. Чын ойлат. Яндар южым  бензин парым шӱлымӧ дене от таҥастаре.

«Шӱшкен, шудым солымет, мурен, савам янымет…».  А вет солымо коклаштак, поснак  канаш шичме годым, муралташ пеш йӧратеныт. Олыкышкат марла тувырым чиен коштыныт.  Кызыт гын… Пашат-мочет, пайремле кеч кажне кечын. Амалым  муаш лиеш. Но Тошто Эшымыште солышо-влакын пайремыштым  тоштемше йӱлалан шотлаш ок лий. Эртен кодшо гыч сайжат, эсогыл тачысе жапыште пайдалын кучылташ кӱлешанжат уло. Тиде - пырля  пашам ыштен, веселитлен моштымо йӱла.

Солышо-влакын пайремыштым конкурс гай тӱҥальыч. Ӧткыр, пашалан чулым еҥын койышыжо, ӱнарже шудолыкышто вигак  коеш. Марла тувыр дене савам кучен лекше ӱдырамаш ден пӧръеҥ-влак   тидым ожнысо гыч  пӧртылтен ушештарышт. Гармоньчо-влакат ятыр миеныт ыле. Уста еҥ, чынак, чылаланат уста - солашат, шокталташат, муралташат…

Шудым солымо деч вара клуб воктенысе аланыште концерт тӱҥале. Репертуаржым пайремыш мийыше уна-влакын мастарлыкышт гычак чоҥымо. Посна-посна мурызо ден шоктышо, тӱшка дене мийыше ансамбль-влакат, солышо-влакын шкешотан пайремыштлан келыштарен, шке  ковыралыкыштым ончыктышт. Таҥасымаште  сеҥыше-влакым гына огыл,  чылаштымат тауштымо серыш да пӧлек-влак дене палемдышт. Пӧръеҥ-влакым кок тӱрлӧ  ийготан-влак  тӱшка дене аклышт: 35 ияш марте  С. Шаймарданов (Ардаш), В. Яметов, С. Сарбашев (коктынат Тошто Эшым гыч) ойыртемалтыч, а 35 ияш деч кугурак-влак  коклаште пеш чаткан да чулымын солен моштымыштым В. Дигитаев (Тӧҥгак),  Н. Янсубаев (Тӧлдӧ), В. Асмаев (Кӱрзе) ончыктышт. Ӱдырамаш-влак коклаште 35 ияш деч самырык таҥасыше лийын огыл (Очыни, ынде солен огыт мошто.), а сеҥыше-влак радамыш Г. Ашиева (Благовещенск ола), Л. Шамиева (Бирск), О. Изибаева (Мишкан села) лектыч.

Кугу пашам шуктымеке, ӱстел сийым тӱшкан авызлыме, уна-влакым шунен-шунен пукшен-йӱктымӧ кумылымат ончыктыман. Пайремым эртарыше оза-влак тиде йӱламат сайынак шуктышт. Верысе клубын методистше Ф.С. Кутлияров тыгай пайремым тарваташ  кок ий ончычак  шонен пыштен улмаш. Тений теве пелашыж дене пырля шонымашыштым  шукташ ял калыкым ушен кертыныт. Федор Сергеевич ялчыже, тыгак предприниматель да поро йолташыже-влак  А. Гайнетдинован, С. Васюткинын, Н. Шамшиеван полшымыштлан нунылан таум ойла.