Чопайыште тыгай уста организатор-влак улыт, тиде Л.М.Тимирбулатова ден А.А. Асылбаев. Ялым тӱзатымаште староста А.Т. Каримовын надырже кугу. Калык пайрем аланыште ончычак шудым солен, мотор сценым ыштеныт, шинчаш теҥгыл-влакым йӧнештареныт, банер-влак дене сӧрастареныт, ӱстел сийым ямдыленыт. Н.М. Давлетова пайремыш тутло кугу когыльым кӱктен конден. Ялчышт да родо-шочшышт деке Бирск, Калтаса районла, Туймаза, Октябрьский олала гыч пеш шуко калык погынен толын.
Келшымаш концерт чылаштым иктыш ушыш: муро-влак марла, рушла, татарла йоҥгышт, калык рӱж куштыш. Шкенан «Ош пеледыш», Чикей ял гыч «Пиалан шӱдыр» мурышо ансамбль-влак, Куртетал гыч Виталий Мустаев, Тумбагуш гыч Аркадий Саитов, Шалтык гыч Лилия Миннуллина ден Зульфия Имаева, Шаран гыч чуваш йолташна, врач Андрей Соловьев, Туймаза гыч Аркадий Альмеев, Октябрьский гыч Роза Султангареева кумылым нӧлтышт да чылам куандарышт. Йоча-влакым тӱрлӧ модыш дене модыктышт. Кум шагат шуйнышо пайрем шижде эртыш да марла куштымаш дене мучашлалте. Кастене самырык-влак дискотекыште шер теммеш куштеныт.