Шукерте ожно еҥ-влак мотор шошым шулдыр мучашешышт шемгорак-влак кондат манын ӱшаненыт. Садлан, уремлаште изэҥер-влак йогаш да шемгорак-влак толаш тӱҥалмеке, нунын лӱмеш «Шемгоракын пучымышыжо» пайремым эртареныт. Тиде йӱлам пасулаште шошымсо ага тӱҥалме деч ончыч палемденыт. Шурно тӱвыргӧ да поян шочшо манын, порылыкым тыланен, кайык-влакым пукшеныт.
Ончыч тиде пайремыш ӱдырамаш, йоча да самырык ӱдыр-влак гына коштыныт. Пӧръеҥ-влак лийыт гын, пайремын ямже да сылнылыкше йомеш манын шотлалтын. Но пайремыш южгунам, мыскара йӧре, ӱдырамашын тувыржым чийыше самырык рвезе да пӧръеҥ-влакат толын лектыныт.
Кайыкым сийлыме йӱла таче мартеат аралалт кодын. Тиде кечын веселитлат, калык вургемым чият, уремыш лектын, мурат-куштат, калык модыш дене модыт.
Мемнан йочасадысе школыш коштдымо икшыве-влакат пайремыште шер теммеш юарлышт. Йӱла почеш пушеҥгыш да вондерыш тӱрлӧ тӱсан тасмам пижыктыльыч. Тиде кечын ондак йоча-влакым, моторын чиктен, сурт еда шӱрашым, шӧрым, ӱйым, сакырым, муным погаш колтеныт. Да моло-влакымат, муро, почеламут-влак дене пырля ушнаш ӱжыныт. Изи ньога-влак веселитлыме жапыште Халима кова ден Гульназира уныкаже пайремын символжым - тамле пучымышым - шолтышт. Тудын дене пайремыш толшо чыла унам сийлышна. А мемнан йоча-влак, тыныс илышым да поян шурно лектышым тыланен, уло кумылым шулдыран йолташна-влакым пукшышт. Ӱдыр-рвезе-влак шаланымеке, кайык тӱшка нунылан мландеш ямдылен кодымо пучымыш деке рӱж чоҥештен тольыч.