Чашка - Калтаса районысо изи мотор марий ял. Тыште виян, поро шӱман, пашаче калык ила. Тудо кеч-могай пашалан тыршен пижеш, чыла пайремжымат веселан, модын-воштыл эртара. Ял кӧргым але ял воктенсе кундемыштым сӧрастараш ой лекмеке, чылан, рӱжге погынен, кутко семын вашке гына моторландарен шындат.
Майысе каныш кечылаште чылан шӱгарлаште ава-ачанан кийыме верым рӱжге тӱзландарышт. Тугодымак яндар вӱд йылдыртатен йоген шинчыме памаш воктене сылне пушеҥгым, мотор пеледыш-влакым шындышт, шӱм-чоным куандарышт.
А Кугу Сеҥымаш пайрем вашеш, онаеҥ-влакым ӱжын, Чашка ял воктене Ош Кугу Юмылан кумалме кӱсотым почна. Ынде Чашка ялысе калыкынат чонжым почын кутырашыже, Кугу Юмо деч шонымашыжым шукташ йодмо лӱман верже уло. Тиде сомылым ворандарыше Сергей Петровлан, Руфина ден Владик Минильшинмытлан, онаеҥ Радислав Зайнетдиновлан, Адик Ибакаевлан, Эмиль Кандановлан кугу таум каласыме шуэш. Поро пашада кужу ӱмыран лийже, Ош Кугу Юмо суапле сомылдам волгалтарен шогыжо.