Ӱярня йор-йор!

Тиде кечын мемнан денат уремыште марла муро йоҥгыш. Уна-влак (ача-ава-влак), марий тувырым чиен, чокан ялукым пидын, шке йочашт дене модаш, пагытым сайын эртараш шонен толыныт, кӧстенечлан мелна кышылым конденыт. Йочасад пашаеҥ-влакат тӱрлӧ марий калык кочкышым ямдыленыт, а ӱстел покшелне самовар чыжлен шоген. Пайремлан лӱмын олым чучылым ыштеныт.

Йочасадын воспитательже, вӱдышӧ Алена Владимировна пайрем йӱла нерген пеш оҥайын каласкалыш. 

Ожно Ӱярням шочмын вашлийыныт. Эрлашыжым курык гыч мунчалтеныт. Вÿргечын мелнам кочкыныт. Нылымше кечын имне дене кудалыштыныт. Кугарнян веҥе оньыж деке унала миен. Шуматкечын унала коштыныт да рушарнян Ӱярням ужатеныт...

Уремыште йӱштырак ыле гынат, мемнан йочана ден погынышо унана-влак ышт кылме. Нуно тӱрлӧ конкурслаште шке мастарлыкыштым ончыктышт: имне дене «кудальыч», пимам кышкен модыч, салма дене мелнам нумальыч, тюбинг дене шке йочаштым шӱдырышт, хороводыш ушнышт. Пытартыш конкурсышто ончыч йоча-влак, вара ача-ава-влак кандырам шӱдырышт. Жап веселан эртыш. Мучашлан, Ӱярням ужаташ манын, чучылым йӱлатышт. 

Тыгай мероприятий-влак марий калык деке пагалыме шижмашым ылыжташ, тудын этнографийжым шымлаш кумылаҥдаш, тÿрлö илыш-йÿлам шуктымо годым марла кутырен да мурен моштымын кÿлешлыкшым ончыкташ эртаралтыт.

Авторын колтымо фото.