«Шорыкйол» пайремым эртарышна

Эн ондак Шорыкйол нерген видеоматериалым ончышна. Умбакыже йоча-влаклан марий суртышто пайрем кузе эртымым ончыктышна. Залым марий сурт гай сӧрастаренна ыле. Сурт оза, Орина кокай, вучыдымын уна-влакым вашлие. Эн кугу уна-влак Рушарня марий школын тунемшыже-влак лийыч. Орина кокай нуным тамле сий дене вашлие: мелнажат, когыльыжат, кыстывийжат, пӱкшыжат лийын. Васли Кува ден Васли Кугызат йоча-влак деч вараш кодын огытыл - нунат марий пайремыш толыныт ыле. Орина кокай нунылан идалык мучко мом ыштымыжым каласкалыш, кидпаша мастарлыкшым ончыктыш. Йоча-влак елко йыр «Изи кож» мурым йоҥгалтарышт, педагог-влак йоча-влак дене сценарий почеш тӱрлӧ модмаш: «Вуверкува выньык» («Ведьмина метелка»), «Сокыртага», «Пӱкен йыр куштен, кӧ эн ончыч верым налеш?» дене модыч . Утларакшым нунылан «Мый кӧ лиям?» («Гадание по профессиям») модыш келшыш. Тунемше-влак кажныже изирак чондай гыч тӱрлӧ арверым луктыч. Мутлан: книга - писатель, таблетка - аптека паша, расческо - парикмахер, совла -повар да молат.

Васли кугыза ден Васли кува тунемше-влакым сайын тунемаш, тыгаяк таза да весела лияш кумылаҥдышт, а Орина кокайлан тазалыкым, пиалым, суртшылан шуко вольыкым тыланышт. Пайремым «кандыра» куштымаш дене мучашлышна.

Марий калыкнан историйжым, йӱлажым огына мондо, ончыкыжымат аралаш тӱҥалына.