Ӱярня пайрем дене!

«Оза лийын мелна ос - тамлен ончаш тол тый, тос!» - телын пытартыш кечынже Мишкан район тӱвыра пӧрт ончылно тыгай муро шергылте. Тушто финн-угор калыкын фестивальжым пайремлышт. Тыге телым ужатыме Ӱярня пайрем дене пырля «Мишкан - финн-угор тӱнян тӱвыра столицыже» программе почеш келыштарыме фестивальын телымсе ужашыже йомартлын почылто. Пошкырт кундемысе тӱрлӧ районла гыч чумыргышо усталык коллектив-влак шкеныштын модыш, муро да куштымаш гоч шке койыш-шоктышышт дене палымым ыштышт. Пайрем годым «Мелна поро» еш фото, марий калык кочкыш, чучыл да «Марий патыр-2020» конкурс-влакым эртарышт.

Пайрем кечын погынаш палемдыме верыш мотор марий тувыран ӱдыр-эрге-влак эрденак чумыргаш тӱҥальыч. Ик жап гыч тусо площадь пеледышан олыкым ушештарыш - шинчалан шыри-вури веле койын! Динамик гыч сылне марий мурсем шоктен. Пайремыште иктат кушталтыде кодын огыл. Ик велне олым гыч ыштыме чучыл-влакым сӧрастарен шогалтеныт, вес могырым ӱстел-влакым шынденыт. Тушто могай гына кочкыш лийын огыл! Ӱярня пайремыште тӱҥ кочкышлан мелна шотлалтеш. Кӧн мелнаже тамлырак, оҥайрак сӧрастарыме - тидым кажне еҥ тамлен, ончен аклен кертын. Кӧ кылмен, тудо самовар гыч шокшо чайым йӱын.

Усталык коллектив-влак гыч кажныже шке кундемысе марий модыш дене модаш ӱжын. Торешланен шогышо лийын огыл: модаш уло кумылын ушненыт. Таз дене имньыла шупшыныт, портышкемым кышкеныт, выньыкым мӱндырк шуымаште таҥасеныт, марий кёрлинг денат модыныт - ревым тоя дене шӱкедылын, писын ончык каяш тыршеныт. Нине модмаште пеш весела ыле. Кова-кочана-влак ожно пеш оҥайын модын моштеныт улмаш!

«Марий патыр-2020» конкурсыш эн чулым, весела, виян марий-влак ушненыт. Нунын коклаште школышто тунемшыжат лийын, пенсийыште канышыжат койын. Кажныже шкеж нерген тӱрлӧ семын палдарен. Кӧ мурым муралтен, кӧ сылнын кушталтен. Музикан ден гитарым шоктышыжат вашлиялтын.

Конкурсым иктешлымеке, сеҥыше-влаклан Чап кагаз ден пӧлекым кучыктышт. Рӱж кидым совен, чылан нунылан ончыкыжымат тыгаяк патыр, весела, шке калыкым йӧратыше лияш тыланышт. Пайремыш толшо-влакымат куан шӱлыш авалтыш: тыге пырля погынен, икте-весым ужын, пырля мурен-куштымаш ончыкыжымат марий йылмым, тӱвырам, марий койыш-шоктышым пагалаш, кугешнаш шӱмаҥда.

Ӱярня пайрем мучашке лишеме. Телым ужатыше чучыл йӱлен кайыш. Тудын дене пырля тек чыла ойго, чер да нелылык йомышт. У шошым ласкалык, поро кумыл да волгыдо шонымаш дене вашлийына!

Авторын фотожо-влак.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».