Пӧклендыштат веселан пайремлат

Моло яллаште тиде пайрем кузе эрта, ом пале. Но Пӧклендыште Шорыкйолым кажне ийынат кӱлеш семын пайремлаш тыршат. Арня мучко суртышто тамле сийым ямдылат, мелнам, пурам, пӱктышым да кыстывийым кӱэштыт. Васли кугыза да Васли кува лийын, музиканым кучен, икте-весе дек коштыт, южгунам машина але имне дене пошкудо яллашкат миен толаш огыт ӧркане. Суртышкышт уна-влак толыт гын, кампетка да пӱкш дене сийлат, ӱстел коклаш чай йӱаш ӱжыт, муралташ-кушталташ йодыт.

Клуб вуйлатыше Л.Б. Кутлукаева ий еда пайрем кечылаште ял калыкым тӱрлӧ мероприятийыш уша: спектакльым ончыктат, курык гыч погынен мунчалтат, оҥай модыш дене модыт, пагытым мурен-куштен, веселан эртарат.

А тений Пӧклендыште Шорыкйол изиш вес семынрак эртыш. Пайрем тӱҥалме кечын ялышке «Россия 1» канал гыч передачым возаш тольыч (Нуным ӱжмыштлан «Чолман» газет редакцийлан тау!). Эрденак Оля Сайпушевна ден Борис Александрович Кутлукаевмытын суртышкышт пошкудышт да родо-шочшышт погыненыт. Озавате, чоклен-чоклен, коҥгаш мелнам кӱэштын. Суртоза, йыргешке киндым послен, ӱстел йыр шинчыше уна-влаклан высмылташ пуэн. Пушкыдо мелна дене чайым йӱмек, ӱстел сем почеш муралтен колтеныт. Вара марлан лекдыме ӱдыр-шамыч вольык вӱташ шорык йолым кучаш лектыныт, капка ӱмбач портышкемым кышкен, ончыкылык пӱрымашыштым мужедыныт. Тыгодым уремыште Васли кугыза-влак койылалтеныт. Уна-влак погынымо суртыш миеныт, муреныт-куштеныт, суртоза-влаклан кӧстенечым кучыктеныт, пошкудо кудышко, ял старостан, В. А. Кутлукаевын, пӧртышкыжӧ пуреныт. Еҥ дек пурымышт годым Васли-влак пӧрт тӧрыштӧ шурным кышкен кодат, тыге тиде ийыште киндылан поян лияш тыланат. Тутло мелнам пурлыт, пурам подылыт да «Кандырам» кушталтен колтат. Суртоза сумкашкышт пӱкш ден кампеткым оптен ужата. Погынышо уна ден Васли-влак пырля курыкыш мунчалташ каят. Туштыжо икшыве-влакат ятыр погынат. Курыкыш кайыме корнышто ваштареш толшо еҥым лумеш урат. Тыге нуно пуйто еҥын аламажым, осалжым, чержым лумеш кодат. Ожно курыкыш ийдер да калай вол дене гына коштыныт гын, ындыжым йоча-влак тюбинг, издер, ече дене юарлен, икте-весышт дене таҥасен мунчалтат. Мунчалтен ситарымек, пайрем мучашке лишемеш. Ик Васли кугызаже кум гана лумеш пӧрдал налешат, тулупшым кудашын, лумжым почкалта да савырен чиен шогалеш. Тиде, еҥ-влак деч осалым, черым, удам поген, ару ош лум дене эрыктен колтымым ончыкта. Вара погынышо ял калык урем покшелне «Кандырам» кушталтен.

Толшо уна-влаклан пайрем моткоч келшен. Нунылан гына огыл, ял калыкланат, икшыве-влакланат, тыге пырля погынен, Шорыкйолым эртарыме пеш оҥайын чучын. Шорыкйол ик изарня гыч вес изарня марте шуйна. Пытартыш кечынже Васли Кугыза-влакым «Ынде вес ий марте ида тол» манын ужатен колтат. Южгунам кугарня эрдене пуйто саташен кодшо-влак, тӱшка дене погынен, сурт еда коштын налыт.

Ик жап Шорыкйол пайремым чыла йӱлаже почеш эртарымым мондаш тӱҥалыныт ыле. Но кызыт калык марий пайрем-влакым аклаш да тоштыеҥ семын пайремлаш тырша. Чын, шке калыкнам, йылмынам, пайремна-влакым пагалаш, эскераш да саклаш огына тӱҥал гын, ончыкыжым чыла тиде йӧршын мондалтеш. Тыге ынже лий манын, чӱчкыдынрак каласкален шогыза шке икшывыда-влаклан могай ямле, оҥай да сӧрал улыт мемнан калыкна да мемнан йылмына. Йӧратыза, пагалыза да арален шогыза шочмо кундемнам да марий калыкнам.