Шорыкйол пайрем дене!

Тыгай пайрем мемнан ялыштынат лие. Мӱндыр Эстоний ден Удмуртий гыч толшо-влак пагалыме уна лийыч. Нуно Мишкан кундемыш финно-угор тӱнян тӱвыра рӱдержым почмашке толыныт. Уна-влакым кондышо автобус ял воктеке толын чарныш веле, верысе мурызо-куштызо-влак унам вашлийме ямле мурым шергылтарышт. Тамле мелна да шоҥешталт шинчыше пура - марий-влакын эн чесле кочыш-йӱышышт. Уна-влак тудым куанен тамлышт. «Кандырам пунен» кушташат чылан рӱж ушнышт. Урем мучко, кид кучалын, мурым шергылтарен, палемдыме суртыш - Михайловмыт ешын пӧртыш - тарванышт. Снежана ден Володя шукерте огыл кок пачашан чапле пӧртым чоҥеныт, кугу еш дене илат - авашт да вич йоча. Суртоза Володя Андреевич - тӱня мучко палыме спортсмен Кирилл Михайловын изаже. Снежана ден Володя Михайловмыт мураш-кушташат тале, кидпаша денат ончылно улыт. Шукерте огыл ешыш йоча пӧрт гыч изи эргым ончаш налыныт.

Унам вашлияш суртоза-влак поян ӱстелым ямдыленыт. Суртыш Васли кува ден Васли кугыза, салтак да Шорыкйол пайремысе калык толын пурышт. Нуно озавате-влакын кидпашаштым ончен аклышт, ий могайрак лиеш, тений кӧлан мом вучыман - чыла раш каласкалышт. Марий калык модыш дене модашат жапым муыч. Мӱндыр уна-влак мурен-куштымашке, модмашке уло кумылын ушнышт, шкеныштын муро ден куштымашыштымат ончыктышт. Весела пайрем уремыште шуйныш.

…Васли кува ден Васли кугыза, йолташышт-влак, кас рӱмбалгымеш веселитлен, имнян терыш шинчын, вес вере кудальыч. Мӱндыр вер гыч толшо уна-влак дене Монар калык шокшын чеверласыш.