Ӱмырешлан кодшо шарнымаш

Икана тудо Узбекистаныш родо-тукымжо дек унала миен да тушеч хлопок вондым конден. Вондо ӱмбалне почылтдымо ужар калта-влак койыныт, но жап эртыме семын нуно лӧзаҥ шуыныт да почылтыныт, да мамык лектын - тыглай ош мамык. Ме тидлан ялт ӧрынна! Тудо мыланна хлопокым кузе ончен куштымо, кеҥежым Узбекистаныште могай шокшо игече лийме, могай саска кушмо нерген каласкален. Ме тудым тӱткын колыштынна.

Евгений Пайкиевич шуко лудшо да палыше, тунемше, интеллигент туныктышо ыле. Икана тудо мыйым занятий гычак урокышто кӱлшӧ книгалан але журналлан мӧҥгышкыжӧ колтыш. Тыге мый икымше гана тудын пӧлемжым ужым. Мыйым книга, журнал да газет библиотека ӧрыктарыш. Нуным трельяж оҥамбалан чаткан вераҥденыт. Тунам чыла еҥынак тыгай библиотекыже лийынат огыл.

Урокыш кондымо хлопок вондан вазе посна шоген. Чыла калтаже почылтынат, тудо мамык дене леведме гай койын. Мый тунам шоналтышым: «Могай чаткан тиде вондерым тыгай тора гычак конден…»

Туныктышына Евгений Пайкиевич шке пашажым, тунемше-влакым да школым йӧратен. Тудлан кӧра мамык вондо могай лиймым икымше гана ужынна.

Эше экономический географийым эртыме годсо ик урокым сайын шарнем. Тунам уже кугурак класслаште тунемына ыле. Евгений Пайкиевич мемнан деч могай кугыжанышым экономически виян эллан шотлымым йодыштын. Экономикын вияҥме амалжым радамленна. А тудо мыланна тыглай шарик подшипникым ончыктен да ойлен: «Эл шкевуя тыгай подшипникым ыштен кертеш гын, тудо экономически виянлан шотлалтеш. Молан, маныда? Шариклан металлым налаш элыште чылажат уло: образований, наука, металлургий, геологий, транспорт да тӱҥжӧ - квалификациян специалист-влак…»