Тошто фотом ончалына?

Мемнан кова-кочанан, кувай-павайнан изишт годым картычкым ышташ йӧнышт шагалрак лийын. Фотоаппаратым гына огыл, эсогыл ямде шем-ош тӱсан фотокартычкым чылан налын кертын огытыл. А ялысе школыш фотографын толмыжо пайрем гай лийын. Тидын нерген В.П. Астафьев «Последний поклон» произведенийыштыже оҥайын возен да иктешлен: «Деревенская фотография - своеобразная летопись нашего народа, настенная его история». Тидын дене чылан келшат, шонем. А мый повесть гыч «Фотография, на которой меня нет» ойлымашым чылалан лудаш да ожнысо фотокартычкыда-влакым шергалаш темлем.

Кызыт фотоаппарат эре воктенна коштеш, кеч-могай татыште фотом ыштен кертына. Шукыж годым тудо картычке марте огеш шу, конешне. Туге гынат марий-влакын, икмыняр фотом чумырен, видеороликым ышташ тунеммыштлан куанем. Нуно ял илышым, пӱртӱс моторлыкым устан ончыкташ тыршат да тӱшка кылыш «колтат». Эх, фото ӱмбалан эше марла чын возаш тунемышт ыле! «Поро Эр Лийже!» да моло тыланымашым лудмо годым чонлан ласкан чучын колта… Но, могай правиллан эҥертен, чыла мутшымат кугу буква дене возат, палымем шуэш… Ончыкыжым мемнан уныка, кугезе уныкана-влак, тиде видеоролик-влакым ужын, мом маныт гын?

Ош-шем фото редакцийын архивыштыжат ятыр уло. Кокымшо фотошто Краснокам район Пермесола рвезе-влакым ужыда. 1-ше радамыште (пурла гыч шолашке) Николай Иванов, Евгений Петров, Владимир Захаров, 2-шо радамыште - Михаил Уваров, Шактияр Каситов. 1960-шо ий. А вес фото шеҥгелан нимом возымо огыл. Ала лудшо-влак кокла гыч иктаж-кӧ ты фотографийын историйжым шарналтен кертеш? Возен колтыза, серышдам вучена.