Ӱмыржым сарзе сомыл дене кылден

Михаил Кузьмич 1943 ий 29 декабрьыште Калтаса районысо Васола ялеш шочын. Ешыштышт куд икшыве лийын - вич эрге да ик ӱдыр. Ава-ачаже колхозышто тыршеныт. Ачаже Кугу Ачамланде сарыште кучедалын, сарын инвалидше лийын. Йолташем Васола тӱҥалтыш, Павасоласе шымияш, луымшо классым Кӧгӧрчен школлаште тунемын. Школ деч вара Юматовысо ял озанлык техникумышто шинчымашым поген. Срочный службыш Уфа оласе военкомат гыч каен. Польшысо «СГВ» формированийыш логалын. Ик жап гыч тудым Вроцлав ола гыч Коломенский высший артиллерийский командный училищыш тунемаш колтеныт. 1963-1966 тунемме ийла деч вара умбакыже службым эртыме корныжо Сибирский военный округ дене кылдалтын. 1969 ий октябрь марте ныл гарнизонышто служитлен - Алтай крайыште взводым, Тува Республикысе Чадан да Алтай крайысе Бийск олалаште батарейым вуйлатен. Кемеров областьысе Юрга олаште переподготовкым эртен. 

Тиде округышто службым эртыме жапыштак Михаил Кузьмич ӱмыр пелашыжым - В.И. Антоновам - вашлийын. 1969 ий сентябрьыште старший лейтенант званийым пуэныт. Тылеч вара Германийысе ГСВГ-ш служитлаш колтеныт, тусо Ютербог олаште верланыше мотострелковый батальонын минометный батарейжым вуйлатен. Ныл ий службо жапыште капитан марте кушкын. Варарак Волгоград олаште посна реактивный дивизион (Йӱдвел-Кавказ военный округ) командирын алмаштышыжлан шогалтеныт. Ик жап гыч Ростов областьысе Каменск-Шахтинский оласе посна реактивный дивизионын командиржылан кусареныт. Туштак тудлан майор, вара подполковник званийым пуэныт да «За службу Родине III степени» орден дене наградитленыт. 

Паша коклаште чулым пӧръеҥ тунемашат жапым муын, 1982 ийыште Ленинград оласе М.И. Калинин лӱмеш военный артиллерийский академийым заочно тунем лектын. Тулеч вара М.К. Гавриловлан Новочеркасск оласе артиллерий дивизийын штаб вуйлатышыже, варарак Волгоград областьысе Урюпинск оласе мотострелковый  дивизийын артиллерий да ракетный войскан начальникше лияш ӱшаненыт. М.И. Калинин лӱмеш военный артиллерийский академий пеленсе высший командный курсышкат  колтеныт. 1986 ийыште полковник званийым пуэныт. Вес ийжылан Афганистаныш колтеныт, пехотный дивизийын артиллерий начальникшын военный советникшылан шогалтеныт (Фарах ола, Иран граница воктене). Вара Кабул олаште Афганистан Республикын Вооруженный Вийжын (сухопутный войска) артиллерий штаб начальникын военный советникшылан служитлен. 

М.К. Гавриловым Йошкар Шӱдыр орден (1988 ий) да 3-шо степенян «Звезда» Афган орден дене (1991 ий) наградитленыт. 1991 ий гыч Волгоград оласе Ял озанлык институтын военный кафедрыштыже служитлен. 1992 ийыште тушечак сулен налме канышыш лектын. Кызыт Коломна олаште ила.