Дружинник лийме пагыт

Дружинникем-влак дене пырля клубышто, моло вереат арулыкым, порядкым эскерен да кучен кертына ыле. А теве ик гана, 1 Май лӱмеш эртарыме пайрем кас деч вара, рвезе-влак клубыштак модаш тарванышт. Мый шкеже гармонист улам, коеш. Гӱжлен модмына годым клуб омса почылт кайыш, ныл татар рвезе кемыштым чот лавыртен пурен шогальыч да рвезе-влаклан марла кушташ «полшаш», йолыштым мӱндыркӧ шуен, ӱдыр-влакын тувыр урвалтыштым лавыртылаш тӱҥальыч. 

Мый гармонемым теҥгылеш шындышым, саде рвезе-влакым воктекем ӱжым да  «Тыште ида осаллане, лучо толмо корныда денак мӧҥгеш кайыза, ато калык дружиным полшаш ӱжаш логалеш» манын, пеҥгыдын каласышым. Нуно, мыйым шӧрын ончен, клуб гыч лектын кайышт. 

Калык шаланен пытымеке, ме клуб вуйлатыше Андрей Яндимиров дене коктын омсам тӱкылаш лекна. Кудывечыш тошкална веле, мемнан ончык шаҥгысе ныл рвезе толынат шогальыч. Иктыже, пешак пеҥгыде кӱкшӧ кап-кыланже, мыйым коҥыла йымач кучен, вуйжо деч кӱшкӧ нӧлтале да кӱлдымаш мут-влак дене кӱдыртен рӱзаш тӱҥале. Мыйын кок кидемат, кок йолемат чоко гай кечат, ялтак ӱнардыме улам. Оралтеш вакшме кӱ площадкеш лупшалеш гын, мыланем мучашат лийын кертеш ыле дыр. 

Но мый тудлан лӱдмемым шым палдырте. «Мый тыйын кидыштет пырыс копасе коля гай гына улам! Кузе от вожыл? Мӧҥгешла лиеш гын, вес сомыл ыле…» - торжанрак гына нунын йылме денак каласышым. 

Мыйым рӱзышӧ тӧпката пӧръеҥ келгын шӱлалтышат, эплын гына мландыш волтен шогалтыш. «Ну, умбакыже мом ыштена?» - йодо мый дечем. «Мый мӧҥгӧ пӧртыл каем, а те шке паледа», - маньым. 

Седыге ойырлышна. Клуб воктенак верланыше почтышто электротул йӧрталтын огыл ыле. Почта вуйлык Павел Байгазов чӱчӱ сомылжым мучашлаш тӧчымӧ дене юванен улмаш. Почтыш пурен, тудын дене кутырышымат, мӧҥгӧ пӧртылын, канаш возым. 

Эрлашыжым, школ пашамым пытарен, мӧҥгӧ толмек, кас велеш оралтыште тошкештам ыле. Ужам, мемнан капка дек кок рвезе лишемеш. Иктыже, мыйым кодшо йӱдым клуб ончылно рӱзышыжӧ, мый дечет эплын гына пурен кутыраш йодо. «Суртышто оза - мыйын авам, тудо разрешитла гын, пуреда», - вашештышым. «Порым шонен толыныт гын, пурышт айда», - мане авам. 

Ме кумытын пӧртыш пурышна… «Унам-влак» пеш аптыранышыла койыт. Мыланем тыге умыландарышт: «Ме тышечын ныл километр ӧрдыжтӧ шогалтыме нефтеразведка вышке пелен полышкалыше улына. Таче эр гычак ынде кушечла паша верышкына милиций пашаеҥ-влак толын лектыт манын вучышна, но… толшо ыш лий. Теҥгече уда койышым ончыктымыланна вуеш ида нал, пожалуйста. Ончыкыжо келшен илаш тӱҥалаш йодына». Нефтяник-влакын продовольственный обеспечений пеш сай ыле, кугурак гына колбаса пӱчкышым, киндым луктын пыштышт, пеленышт кочывӱдымат налыныт. Мый чай йӱаш самовареш вӱдым шолтышым. Ик шагат наре ойласен шинчышна. Нуно кертмышт семын полшаш сӧрышт. 

Тунам мый физкультурым туныктем ыле. Спортплощадкылан кӱртньӧ гыч тӱрлӧ инвентарьым ышташ кӱлын, а нунын дене труба, тӱрлӧ металлопрокат ситышашлык ыльыч. Мыйын чертеж дене икмыняр инвентарьым варитлен пуышт. Варажым вес верыш куснен кайымышт годым нефтяник-влак дене поро йолташ семын ойырлышна…

 Нунын деч спортинвентарьым ыштымышт годым йодым: «Молан те пайрем кастене мый декем тынар шыдын керылтда?» Ойлымышт гыч амалжат рашеме… Мемнан суртлан ваштареш осалрак койышан Толмалче лӱман ӱдырамаш ила ыле. Тудо шкенжын племянницыжым мыланем марлан пуаш шонен пыштен. А мый шым келше, «Ӱдыр налаш пагыт шуын огыл, институтыш тунемаш пурышашем да тунемшашем уло» маньым. Сандене тудо тиде ныл рвезым шке шолтымо аракаж дене сийлен да мыйым кыраш кутыртен улмаш.