«Телымсе сарлан» 80 ий темеш

«Телымсе сарым» кызыт шагал шарнат, а вет тудо - Кокымшо тӱнямбал сарын тӱҥалтыш ужашыже.

«Телымсе сар» нерген финн автор-влак Э. Энгл ден Л. Паананен 2006-шо ийыште книгам луктыныт. Уста автор-влак совет войскан «Линия Маннергейма» оборонительный сооружений пелен кредал сеҥымыж нерген возат. Палемдыме сарым шукыжым финн могырым почын ончыктат. Тиде оборонительный рубеж пеш кугу укреплений лийын, Карельский перешейкыште верланен. Финн маршал К. Маннергеймын лӱмжым нумалын. Туге гынат мемнан войска-влак тиде оборонительный рубежым сеҥен налыныт. Кӱчык гына сарыште пеш шуко еҥ колен. Сар шӱдӧ вич кече шуйнен. Совет Союзын салтакше-влак финн-влакым писын сеҥаш шоненыт, но финн салтак-влак достойно кредалыныт. Финн-влак изи вий дене кугу вий ваштареш (по принципу «motti» - мотти) кредалаш тунем шуыныт. 1970-ше ийлаште Н.С. Хрущев мемуарыштыже Совет Союзын ик миллион наре калыкым йомдарымыжым ончыктен.

Шопкер ял гыч лейтенант Е.И. Ишмурзин кугу боевой опытым Совет-финн сарыште налын. Наградыже-влакат лийыныт. 1942-шо ийыште Воронеж фронтышто колен. Тиде сарыште мыйын ачамат, Я. Ибулаев, лийын. Маннергейм линийым сеҥен налаш шонен, 1940 ий 29 февральыште 613-шо стрелковый полкышто кредалын. 1940 ий 11 мартыште Выборг ола воктене ачам нелын сусырген. Тудо пулеметчик лийын. Кредалмаш годым вуйышкыжо пульо логалын. Мыйын шонымаште, тудым «Кукушка» манмет лӱен (Финн снайпер-влакым тыге маныныт.). Санитар-влак тудым 1836-шо номеран эвакогоспитальыш колтеныт. Вич тылзат пеле госпитальыште эмлалтын, илыше кодын. Врач-влакын комиссийышт военный учет гыч сниматлен. Кокымшо группа инвалидностьым пуэныт. Ачам ӱмыржӧ мучко, пенсий марте, школышто туныктышылан тыршен.

«Телымсе сар» Кокымшо тӱнямбал сарыштат, геополитикыштат кугу кышам коден.