Йоҥылыш паша

Ожно, мыйын самырыкем годым, теле эррак, октябрьын лучкыж деч вара, толеш ыле. Кече йӱкшемдымек да лум вочмек, калык ютым да вольыкым погыстараш тӱҥалын. Комбым кызытсе гай шокшо вӱдыш чыкен луктын але утюг дене ночко лапчык гоч ырыктен кӱрын огытыл. Кукшо комбым кӱрын, ой-ой, кузе парня-влак ноен пытат да корштат ыле. Мыняр еҥлан комбым кӱраш полшаш мийымым шотленат от пытаре. Кугу вольыкын кӧргӧ тырлыкшымат пырля погынен мушкынна, эрыктенна.

Ноябрьыште шыл кочмо пайремым эртареныт. Шкеныштын да моло ялласе родо-шочшыштым, полшышо-влакым сийленыт.

Эмась ден Менсепат ик кечын унам ӱжыныт. Сийым ямдыленыт, пӱтынь комбым, шке ыштыме лашка дене шӱрӧ лемым, тар пучымышым шолтеныт, мелнам кӱэштыныт.

Уна-влак погыненыт, кочкыныт-йӱыныт. Менсепа унаже-влакым мурен-мурен сийлен, Эмасьыже гармоньжым шокталтен. Уна-влак каяш тарванымек, Менсепа, мурен, Эмась, музиканжым шоктен, капкаш шумеш ужатеныт.

Пӧртыш пурымек, Менсепа ӱстел ӱмбач кӱмыж-совлам погыстарен. Эмась самоварым шолтен. Коктын, ӱстел коклаш шинчын, чайым подылыныт, вара малаш возыныт.

Эрдене Эмась вольык ончаш лектеш, Менсепа, самовареш вӱдым ырыктен, корка-влакым мушкеш. Самоварым уэшлан шынден, ушкал лӱшташ кая. Эмась, пӧртыш пурен, возакеш олта, шӱрӧ ден пучымышым ырыкташ шында. Пӧрт шокшылан коҥгаш огеш олто, кастене олташлан пум пурален шындаш манын, коҥга кӧргыш ончалеш да чылт ӧреш. Тушто падыштыме комбо шылан кугу кӱмыж шинча…

- Ачашт, самоварет шолеш вет, петыре! Мо тӱҥын шогет? - манеш ушкалым лӱштен пурышо Менсепа.

Пелашыже, нимом пелештыде, ӱстел ӱмбак коҥга гыч шылан кӱмыжым конден шында.

- Эй, юмыжат, тиде мо тыгай? Могай йоҥылышым ыштенна! Ынде еҥ воштылеш, «каткан» лӱмым тушкалтат вет! Мом ыштена, ачашт? - йодеш Менсепа.

- Кӱмыжысӧ шылым ару ош солык дене капле да кугу кӱжгӧ шалеш пӱтырал. Тый писе, куштылго улат, волгалтмеш, шылым шалатен лек. Кӧлан могай лум кучыктышашым шке палет! - шӱда Эмасьыже.

- Палем, палем! - манын, ӱдырамаш вашке гына чия да, кӱмыжшым кидешыже кучен, лектын ошкылеш.

Теве тыгай йоҥылыш паша лийын. Комбо шыл кочкаш погеныт, да… пукшен огытыл. «Вует огеш ыште гын, йоллан нелылык толеш», - манеш калык. Тиде тыгак!

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».