Латшым ияш сарыш каен

Мишкан район Ирсай ялыште илыше Алей Семенович Семенов (снимкыште) тугодсо шучко жап нернен тыге шарналтен каласкала: «Совет Армийыш мыйым 1943-шо ийыште нальыч. Тунам мылам латшым ий веле темын ыле. Военкоматыште кужаш кучышт, тушеч Уфашке наҥгайымыштым кас марте вучышна. Казарма марте кок кече йолын кайышна. Тушто шинельым чиктышт. Тудыжо мылам, 152 сантиметр кӱкшыт капан рвезылан, кужу ыле - ошкылмем годым почешем мландеш шӱдырнен каен. Тошто Уфаште винтовкым кучаш, лӱйкалаш туныктышт. Икана ачам ял гыч имне дене тольо, мыланем ик мешак кукшо курикам конден кодыш. Но ме тудым чыланат пырля кочна.

Алей Семенович фронтышто тушман ваштареш маршал И.С. Конев дене пырля Эстонийыште, Чехословакийыште, Венгрийыште кучедалын. А Сеҥымашым Польшысо Вроцлав олаште вашлийын. Тыгак Японийын чекыштыже, Приморский крайыште кредалын.