Кугу вӱдлан - 40 ий!

Эрдене кынел лекна гын, оралтым пулвуй марте вӱд налын. Тунам уремыште асфальт лийын огыл. Корно воктенсе дамбымат ышташ гына тӱҥалыныт ыле. Садлан уремыште мемнан гутлаште кок отро гына кодо. Ик-кок кече гыч тудыжат вӱд йымалне лие. Кевыт гыч сатум налаш пошкудо Мрас ялыште илыше лапкызе Равега-апам пуш дене кондатат, вара намиен кодат ыле.

Геннадий (Валеев) чӱчӱн шарнымашыж гыч: «Эрдене кынел лектым, кудывечыште - вӱд. Пакча гыч уремышке вӱд йога. Артанаште пу шагалемын. Кушко пурен? Куп (болотный) кемым чиен лектымат, ончем: вӱд, пу комылька-влакым шӱдырен луктын, капка деке наҥгая, вара уремыш йоктара…»

Чын але шоя, ик пенсионер еш кастене монча омсажым петырен огыл манын ойлат ыле. Монча кӧргыш вӱд темын. «Айда, лийшашыже лийын», - манеш павает да омсажым петыра. Вӱд кайымек, мончашкыже пура, а тушто - кол-влак!

Школышто занятий-влакым чарышт, индешымше май эртымек веле тунемаш кайышт. Йоча-влаклан эше ик каникул лие. Кугырак ийготан ӱдыр-рвезе-влак эҥерыште пуш дене коштыныт. Эҥер мучко муро йӱк йоҥген. Мо дене романтикысе путешествий огыл? Пуш дене коштшо шуко каче ден ӱдыр, илен толын, у ешым чумырен. Пиалан жап лийын!