«Кунам мемнан дек газ толын шуэш?»

«Пагалыме Радий Фаритович!

Кодшо курымын 90-ше ийлаштыже Мишкан районышто газификаций сомылым шуктымо план ыле. Тудын негызеш «Рефандинский» совхозын рӱдӧ илемыштыже 1992-шо ийыштак газым пуртен шуктышаш ыльыч. Но ты сомыл верже гычат тарванен огыл! «Рефандинский» совхозысо ял-влакыш таче мартеат газ толын шуын огыл. Еҥ-влак утларакше газ баллон дене пайдаланат. Газлан райрӱдыш коштыт, но южгунам туштат газ огеш лий, садлан лишылрак олалаш каяш верештеш. Шоҥгырак еҥ-влаклан тыге кошташ пешат йӧндымӧ. Газ акат ий еда шергештеш. Кызыт ик баллонлан 950 теҥгем тӱлыман.

Пӱрӧмучаш, Изи да Тошто Накаряк, Новотроицк, Озерка, Рефанде, Тошто Арзамат, Укозаш яллашке газым пуртымо сомылым лишыл жапыштырак шуктышт ыле манын шонена. Пагалыме Радий Фаритович, ме ӱшанена, Те тиде йодышым шинча ончылныда кучаш тӱҥалыда, да лишыл жапыште мемнан декат газ толын шуэш».

«Пагалыме Дмитрий Яметович!

Мишкан районысо Новотроицк да Тошто Арзамат яллаште газификаций дене кылдалтше йодышлам эскеренак шогена. Нине яллаште газ пучым пыштыме. 2019 ийыште «ГЕО-ПРОЕКТ» ООО «Башкортостан Республикысе Мишкан районысо Йылыш ял - Озерка ял - Тошто Арзамат ял - Изи Накаряк ял - Укозаш ял - Пӱрӧмучаш ял - Рефанде ял - Новотроицкий села-влак кокласе газпуч» объект шотышто проект да шымлыме пашам тӱҥалын. Ты объектым 2020-шо ийыште чоҥаш планыш пуртымо. Чынак, Мишкан районышто калыклан вишкыдемдыме газым шупшыктышо организаций уке. Газ баллон-влакым темыше лишыл организаций Бирск олаште верланен».