«Азам ыштыме пӧрт уке гын, кушто шочыктыман?..»

«Эндокринологат, неврологат, УЗИ-ат уке. Рашрак каласаш гын, уло, но специалист дек мийымылан оксам тӱлыман, тудыжо шуматкечын кӱчык жап гына пашам ышта, - возен Калтаса селаште илыше Наталья (лӱмжым вашталтыме. - ред.). - Тазалыкым келгынрак текшыраш кӱлмӧ годым анализыш огыт колто, идалыкаш лимит «петыралтын», маныт. Кидыштына тугок полис улмек, молан ме анализым сдатлымылан оксам тӱлышаш але оксала пашам ыштыше специалист-влак деке коштшаш улына?»

«Салам лийже. Калтаса районышто 3 больница уло: БР ГБУЗ Калтаса ЦРБ, Краснохолмский район больница, Кутерем больница. Чаманаш логалеш, 2017 ий 1 январь гыч Калтаса районысо мӱшкыран ӱдырамаш-влак Нефтекамск оласе больницын, район-влак кокласе перинатальный рӱдерын, икшывым ыштыме пӧлкаштыже шочыктышаш улыт. БР Здравоохранений министерствын акушерский койко-влакым оптимизироватлыме приказше почеш Калтаса больницыште оптимизацийым эртарыме, тудын негызеш район больницыште 4 койкым шагалемдыме, тидын шотышто кумытшо - мӱшкыран ӱдырамаш да икшывым ыштыше-влаклан, иктыже - патологиян мӱшкыран-влаклан. Полышым писын пуаш кӱлмӧ экстренный случай годым больницыште икшывым шочыкташ йӧн уло. Патологиян мӱшкыран ӱдырамаш-влаклан вер уло. Вашкеполыш медицина пӧлкаште азам ышташ тӱҥалше-влакым шочыктымо лишыл пӧлкаш наҥгаяш 2017 ий 1 январь гыч ешартыш акушер бригадым ойырымо.

Калтаса да Краснохолмский селаласе ӱдырамаш консультацийлаште эше кок акушеркым ешарыме.

Эндокринолог Кутерем селаште кажне кечын 9.00 гыч 17.00 шагат марте пашам ышта, Калтаса да Краснохолмский селалаш арня еда кушкыжмын мия. Невролог Калтаса селаште шочмо гыч кугарня марте 9.00 гыч 17.00 шагат марте, шуматкече сайын 10.00 гыч 14.00 шагат марте Калтаса ЦРБ-ште пашам ышта. 2018 ий 12 декабрь гыч Калтаса ЦРБ-ште УЗИ кабинет пашам ышта, тушто ультразвуковой диагностика дене врач-специалист приниматла (2018 ий 11 декабрь марте тунемын). Тӱҥ врач Р.В. Зариповын мутшо почеш, анализым наледыме шотышто йодыш уке. Тыгай факт уло гын, шижтараш йодына, ты йодышым Здравоохранений министерство дене пырля решатлена».