Шочмо-кушмо верым огыт мондо

«ЧОЛМАН» ГАЗЕТЫМ МАX-ЫШТЕ ЛУДЫНА!

А кеҥежым ты суртлаштат илыш ылыжмыла чучеш. Теве кундемнан шочшыжо-влак Атнабаевмытат - Владимир Мрясевич ден Галина Исламовна - ынде 45 ий Сургутышто илат гынат, кажне кеҥежлан Акпарсыш ача-аваштын шочмо суртышкышт пӧртылыт.

«Мый Акпарсыште шочын-кушкынам. Верысе школ деч вара Нефтекамск олаште электромонтерлан тунем лектым, - каласкала Владимир. - Ешыштына 6 икшыве кушкынна.   Авана-ачана мемнам сайын ончен куштеныт, кугуракым пагалаш, изиракым чаманаш, келшен илаш, пашам йӧраташ туныктеныт. Ме, тудо жапысе йоча-влак, шуаралт кушкынна. Акам да шӱжарем-влак дене кызытат, икте-весылан полшен, пырля илена. Ожно шудо ямдылыме пагытлан, лӱмын отпускым налын, ачай-авайлан полшаш толына ыле гын, ынде Лида шӱжаремлан шудым ышташ коштына.

Шоҥгемме семын шочмо вер сагындара, шкеж дек ӱжеш. Яндар южым шӱлен, шочмо суртышто илен, идалык мучкылан вийым налын каена, садлан тазалык улмо, машинам шке виктарен кертме годым толын кайыде огына чыте».

Галина пелашыже, Благовещенск педучилищым тунем лекмек, Акпарс школыш тӱҥалтыш класс-влакым туныкташ толын, кочаж-коваж дене илаш тӱҥалын. Владимир дене палыме лийыныт да келшаш тӱҥалыныт. Рвезе майыште армий гыч пӧртылын да школышто физкультур туныктышылан ышташ тӱҥалын. Тыге школышто кок ий пырля тыршеныт, ешым чумыреныт.

Вара Владимир Сургутыш пашам ышташ каен, ешыжымат пеленже наҥгаен. 

Владимир Сургутышто 2-шо ГРЭС-ыште шке профессийже дене пашам ыштен, пенсийыш лекмекат, эше 10 ий тыршен. Галина ончыч йочасадыште воспитательлан, вара туныктышылан ыштен. Владимир Мрясевич ден Галина Исламовна пашаштышт пагалыме еҥ лийыныт, марий калыкнан, кундемнан лӱмнержым кӱшнӧ кученыт да чапшым нӧлтеныт. Вате-марий кок ӱдырым - Елена ден Ларисам - ончен куштеныт. 

Атнабаевмытын суртыштым урем дене эртыше кажне еҥ куанен онча: пакчам, пӧрт ончылым, оралтым арун кучат, кудывечыште тӱрлӧ пеледышым куштат, а пакчаште олмапу, слива, чие, эҥыж койыт. Пӧртыштым ачален, чиялтен шогат, окнам вашталтеныт, пӧрт йырым профнастил дене печен налыныт, у мончам ыштен шогалтеныт. Вӱдымат пӧртышкак пуртымо, ырыкташ газымат чарыме огыл. Галина, емыжым поген, компотым, вареньым ямдыла, арулыкым эскера. Шыжым да телым суртым ончаш Лида шӱжарышт толын коштеш.

Атнабаевмыт ачашт ден аваштын сугыньыштым шуктат, икте-весыштлан полшен да ваш келшен илат, шочмо кундемыштым, ача-ава суртым огыт мондо.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!