+24 °С
Облачно
Илыш пасу
12 Августа , 09:32
Российын Геройжо дене вашлиймаш
Ямал-Ненец автономный округысо Тарко-Сале олаште илыше Евгений Шамратов 11-ше ий Пуровский районын администрацийыштыже водительлан тырша. Мишкан район Тынбай ял рвезе 2006-шо ий гыч ешыж дене тиде олаште ила. Коклан тÿрлӧ олалаш командировкыш коштеш. У Уренгой олан 50 ияш лÿмгече мероприятийышкыже командировкыш мийымыж годым лийше вашлиймашым тачат порын шарналта.
В. Шарпатов (шолаште) ден Е. Шамратов. 2025 ий. Кызыт В. Шарпатов Тюмень олаште ила. Е. Шамратовын еш архивше гыч налме фото.
«ЧОЛМАН» ГАЗЕТЫМ МАX-ЫШТЕ ЛУДЫНА!
Тунам тудлан Российын Геройжо В.И. Шарпатовым тÿрлӧ вашлиймашлашке кум кече машина дене кондыштараш заданийым пуэныт. Палыме лиймек, поро кумылан, мутланаш йӧратыше Владимир Ильич рвезын могай кундем гыч улмыжым йодын. «Башкортостан гыч», - пелештен Женя. «А мый Марий Эл гыч улам», - каласен В. Шарпатов. Рвезын «Марла моштеда мо?» манын йодмыжлан «Икте, кокыт, кумыт, нылыт, визыт» манын шотлаш тÿҥалын да чарналтен. Женя, «Кудыт, шымыт, кандаше, индеше, лу» манын, умбакыже шуен. Вара коктынат ваш ончалын шыргыжалыныт. Тыге кок марий шоныдымын-вучыдымын вашлийыныт. Кум кече жапыште Евгений Вениаминович В.И. Шарпатовын илыш-корныжо, элнан историйыштыже возалтше кугу событий нерген шуко оҥайым пален налын.
Ил-76 экипажын командирже Владимир Шарпатов Афганистаныш кок гана грузым намиен. 1995-ше ий 3 августышто кумшо гана тиде элыш чоҥештеныт, но мӧҥгӧ пӧртыл кертын огытыл... Эл-влак кӧргысӧ умылыдымашлан кӧра нуным идалык утла пленыште кученыт. 1996-шо ий 16 августышто экипажын командирже В.И. Шарпатов, йӧным муын, самолётым южыш нӧлтал кертын, тыге шым еҥан экипаж плен гыч утлен. Тидлан тений 16-шо августышто 30 ий темеш.
Икмыняр ий гыч тиде событий негызеш режиссер Андрей Кавун «Кандагар» кинофильмым возен, тудым элыштына 2010-шо ийыште ончыкташ тӱҥалыныт. Фильмыште экипаж командир Владимир Шарпатовын рольжым актёр Александр Балуев модеш. Кӧн кумылжо уло гын, интернетыштат марий калык гыч улшо Российын Геройжын илыш-корныж дене палыме лийын да «Кандагар» кинофильмым ончен кертеш.
Евгений Шамратов ден Владимир Шарпатов чеверласыме годым икте-весыштлан телефон номерыштым пуэныт да кажныже шкеж дек унала ÿжын, ты вашлиймашым шарнен илаш пырля шогал войзалтыныт.
