+18 °С
Дождь
Илыш пасу
30 Июля , 05:55
Сай шарнымашым коден…
Чон шортеш. Шинчавӱд йӧре Мария Максимовна ЯНСЫБИНАН (снимкыште) ош тӱня дене чеверласымыж нерген чаманен увертараш перна…
«ЧОЛМАН» ГАЗЕТЫМ МАX-ЫШТЕ ЛУДЫНА!
М.М. Янсыбина 1939 ий 20 пеледыш тылзыште Кужнур ялеш шочын. Верысе школышто шым классым тунем пытарымек, 1956 ийыште Чорай кыдалаш школым тунем лектын да тудо ийынак Панфилов лӱмеш колхозыштына бухгалтерлан ышташ тӱҥалын. 1965 ий вӱдшор тылзе гыч сулен налме канышыш лекмеш, библиотекарьлан тыршен, паша деч кӱрылтде, Уфасе библиотечный техникумым тунем лектын. Сай лектышан пашажлан тудлан шуко Чап грамотым кучыктеныт, «Паша ветеран» медаль дене палемденыт.
Мария Максимовна ӱмыржӧ мучко Кужнур ял калык коклаште лийын. Книга кугыжанышышкыже изижге-кугыжге кумыл нӧлтын коштынна. Тудо кажне еҥым кумылын вашлийын: йочалан кӱлеш литературым ойырен налаш полшен, кугурак-влакланат кӧлан мом темлаш пален. Чыла денат кутырен моштен, йочан кумылжым савыраш тыршен. Адакшым библиотекарьын сомылжо тиде веле мо… Тӱрлӧ агитаций пашаже мыняре! Эр эрдене Маша кокана фермыште ушкал лӱштышӧ-влак мыняр шӧрым лӱштен налмым, уржа-сорла жапыште мыняр шурным солымым да шиймым умылаш правленийыш миен. Соцтаҥасымаште кӧ ончылно улмо да моло нерген «Молния» лаштыкеш возен, фермын, гаражын увер оҥалаштышт увертарен шоген. Тунам текстым кызытсе гай принтер гоч лукман огыл, перам кучен, кид дене возыман лийын! Ару почеркше тачат шинча ончылнем сӱретлалтеш…
Мария Максимовна ялыштына «Чолман» газетын эн илалше лудшыжо ыле. «Марий калыкын илышыже нерген чыла уверым газет гыч пален налам», - каласыш тудо шошым. «Чолман» газетын 35 ияш юбилейышкыже мийымыдам куанен лудым, фотосӱретымат ончышым» манмыже шӱмеш шыҥен кодо.
Кугун чаманаш веле кодеш, пашаче да тыршыше, илыш корным ончык вӱдышӧ тукым гыч ик эн сай, тыматле, поро чонан Мария Максимовна Янсыбина дене пырля тудын годсо тукым денат чеверласаш логалеш. Нимом ышташ ок лий, уло шинчымашышт, историйышт пеленышт кая, а мемнан пелен, чон коржын, поро шарнымаш веле кодеш.
Кужнур ял калык Тендам, йӧратен да пагален, эре «Маша кокай» манеш ыле. Кийыме мландыда пушкыдо лийже, узьмакыште лийза, Мария Максимовна.
