«Чолманлан» - 35 ий. Тукым гыч тукымыш кусна

Туныктышо лийме нерген шонымаш мылам авамын шӧржӧ денак шыҥен, очыни. Мый Башкир кугыжаныш университетын химий да биологий факультетшым тунем лектынам. Туныктымо паша стажем 39 ий, шым ий завуч пашамат шуктенам. Пашамым йӧратен, уло чон дене ыштенам. Кӱшыл категориян туныктышо улам, пашамым РСФСР Просвещений министерствын Чап грамотыжо да «Башкортостан Республикысе образованийын отличникше» знак дене палемденыт. Ешыштына авам ден ачам деч вара эргым, шешкым-влак, еҥгам туныктышо династийым умбакыже шуят, Галинмыт (Альмакаевмыт) ешнам «Башкортостан Республикын пашаче династийже-влак» энциклопедийыш пуртымо. Чумыр туныктымо стажна - 245 ий. 

Авамын конкурсыш возен колтымо почеламутшо нерген 1998 ий 29 июльышто лекше «Чолман» газетыште тыге возымо: «Конкурс тыгак Шаран район Урсай ялын Минзавар Альмакаеван поэзий кумыл минутшылан логалын. Авторна 12 куплетан почеламут шотан мини-романым возен колтен. Тудо тыге тӱҥалеш:

Яра шинчымына огеш шу,

Лулеге пашам йӧрата.

Нал шаньыкым, 

                       шудым соло,

Алаша шудым вучалта… 

Тыге романын геройжо-влак олыкыш каят, кечыгут тыршат, а кастене:

Ял уремыште весела,

Лектын, 

                  Яшам ужатышна.

Неле лие гынат паша,

Алал кумылын канена.

Тыгак 1997 ий 15 октябрьыште лекше номерыште авамын ик буква дене возымо ойлымашыжым савыктеныт. 

Пагалыме газет пашаеҥ-влак! Чыладамат йӧратыме «Чолманнан» шушаш 35 ияш юбилей пайремже дене шокшын саламлем, пеҥгыде тазалыкым да у сеҥымашым тыланем.