Ялжым йöрата

Тудо Шопкер ялеш шочын, тыштак кандаш классым тунем лектын. Совет армий радамыште 4-ше разрядан повар лийын. Армий деч вара Уфанефть-2 НГДУ-ш пашаш пурен да 35 ий ПГС операторлан ыштен. Пашам сайын ыштымыжлан жапыштыже эсогыл лӱман шагатым пӧлекленыт, Чап грамотым кучыктеныт. 

Виталий Салимьянович - пеш оҥай айдеме. Сай кумылан, эре воштылал гына колта. Ӱмбакыже ончалат гын, 68 ияш манынат от шоналте. Тудо пÿртÿс дене пырля ила. Пеҥгыде кап-кылан айдеме, спорт дене кылым куча. Рвезыракше годым йÿштö вÿд дене чывылталташ йöрата ыле. Кызытат тÿрлö упражненийым ышта, еҥ-влакымат кап-кылыштым шуараш туныкта. Тамака да «ужар кишке» дене таҥ огыл. Кеҥежым кечывал деч вара тудым стадионышто але пÿртÿс лоҥгаште, телым ечыгорнышто вашлияш лиеш. Шкенжын ечыгорныжат уло. Тудо курык ÿмбач, пÿнчер, кожер, шопкер гоч эрта. Тушан маякым шынден. Йöратыме тумыжо воктен чарналтен, шке семынже медитацийым эртара. Тиде пушеҥге шуко вийым пуа, манеш. Тудо ик ганат яра ок шинче: ялысе, ялсоветысе але районысо мероприятийлаш ушна, таҥасымашлаште вийжым терга.   

Кушталташ гына огыл, шке семынже муралташат йöрата. Кодшо ийын ялысе Ӱярня пайремыштына шке шонымо такмакше-влакым йоҥгалтарыш. Марий концерт-влакым кодаш ок тырше, кÿлеш гын, Мишкан селашкат чымыкта. Концерт годым моторын кушталта. Шукыж годым ÿдыржö ден веҥыжат кушташ лектыт. Кодшо кеҥежым ватыж дене Йошкар-Оласе Пеледыш пайремыш миен, куштен-мурен, куанен тольыч. 

Виталий Салимьянович мончаш арняш кок гана пураш кÿлеш манын ойла. «Шем монча пайдалырак. Шукыж годым куэ выньыкым кучылтына, вет тудо уло  кап-кыллан пайдале. Но мый моло тÿрлö выньыкымат кучылташ йöратем. Тумо выньык мÿшкыр кавалан полша, изиш коям шагалемда. Писте выньык верге, нöлпö выньык йыжыҥ корштымо годым полшат. Пызле выньык нервылан пайдале, пужымо, шинча вочмо деч утара. Шопке выньыкым августышто ик кече гына налыт…» - мутшым шуя тудо. 

Виталий Салимьянович - самырык-влаклан сай пример. Ожсо марий калыкын илыш-йÿлажым умбакыже шуя. Тудо мемнан кугезына-влак семын пÿртÿсым пеш сайын умылен мошта.