«Кылым йомдараш ом тӧчӧ»

Александр Акбатырович, газет-влакым ий шот дене поген, подшивкым ыштен арала. Эсогыл шкешотан картотекыжат уло: кушто, кунам, могай номерыште мо нерген возымым палемда, чыла документшым чаткан арала. Творческий еҥ кызытат яра ок шинче: книгам шуко лудеш, Шаран районышто гына эртарыме Дийын пайремлан тений 100 ий темме вашеш кугу статьям ямдыла.

- Тиде шкешотан историй. Ала кузе «Чолманын» корреспондентшылан ышташ тӱҥалмыдам шарналтеда ыле? - йодым туддеч.

 - Ончыч мый Шаран районысо «Знамя Октября» газетыш возенам. 1991-ше ийыште республикысе общественный корреспондент-влакын Уфаште эртыше 13-шо съездышкышт делегатлан сайлышт. Тушто Игорь Губаевым вашлийым. «Вашке республикыштына марла газетым лукташ тӱҥалына», - мане тудо. Тунам серыш гоч кылым кученна. «Чолманын» 1-ше номерже серыш дене тольо. Ончыч районышкына 10-20 экземпляр газетым, вара 100 зкземпляр дене колташ тӱҥальыч. «Возыза мемнан газетыш, таум гына каласена. Тендан кундем гыч увер толаш тӱҥалеш гын, пеш сай лиеш ыле», - серен Игорь Иванович. Кок ий газетым районысо активист-влак гоч шалатен шогенам. Шкежат ала-кузе, кумыл пыштен, икмыняр гана возен колтенам. Вара редакций гыч, тӱҥ паша деч кӱрылтде, газетыш корреспондент семын возен шогаш темлымашан серыш тольо. Тыге «Чолман» газетын корреспондентше лийым. Тунам Усола школышто туныктенам, завуч пашамат шукташ да, жапым муын, командировкышкат кошташ кӱлын. Усола школын тунамсе директоржо В.А. Ибяевлан кугу таум ойлем, иканат ӧпке мутым каласен огыл, 15 ий шке коллективыштыже корреспондентым кучен.

- Тугеже, пашада эше ешаралтын?

- Пашам ышташ тÿҥалмекем, Шаран районыш веле огыл, моло лишыл районлашкат марий-влак коклашке лекташ тӱҥальым. Калык дене вашлийме годым газетым шарыме, подпискым ыштыме нергенат ятыр кутыралтын.

- Кызытсе жапыште газетым лудшо-влак деке шуктымо йодышат пÿсын шога. Редакций тиде пашам шке вийже дене да эн тÿҥжö поро йолташыже-влакын полшымышт дене шукта. Нунын нерген таче мом каласен кертыда?

- Материалым погымаште мыланем шукын полшеныт: Аркадий Алтыкаев (Туймаза ола), Минлибай Мирсалихов ден Минлиян Кисмеев (Бакале район), Радик Тимиряев, Амирхан Асылгареев, иза-шольо Ахметгалей ден Арсений Кунакбаевмыт (Белебей ола), Амирян Латыпов, Мират Байбулдин (Чекмагуш район), Ахмет Танакбаев, Тимиргазе Минлигалин, Тамара Зайнуллина, Раиса Уразаева (Белебей район), Михаил Дмитриев (Илиш район). Нунылан моткоч кугу тау! Мый тачат умылем, полышкалыше-влак деч посна газетлан илен лекташ йöсö.

- Александр Акбатырович, тендам газет шотышто мо тургыжландара?

- Самырык тукым марла огеш ойласе манашат лиеш, лудашат кумылышт уке. Тидым марий калыкын кугу ситыдымашыжлан шотлем. Газетыш возышат шагалемеш, улыт гынат, ийготышт шукем толеш. Агитацийым шагал намиенам дыр манын, шкемымат титаклем. Мый шкеже газет дене кылым йомдараш ом тӧчӧ. Кажне номерым вучем, тӱҥалтыш гыч мучаш марте лудын лектам. Теве ӱмыр гына ала-молан вашкен куржеш.

- Газет пашаеҥ ден лудшо-влаклан тыланымашда могай лиеш?

- Ме «Чолманын» творческий ешыж дене келшен, умылен, икте-весылан полшен пашам ыштышна. Мый редакцийысе чыла пашаеҥлан, тыгак лудшо-влакланат пеҥгыде тазалыкым, у сеҥымашым тыланем. Налза, лудса «Чолман» газетым!

- Тау, Александр Акбатырович! Теат таза, кужу ӱмыран лийза.