«Ӱмыр мучко поро шонымаш да поро паша дене иленам»,

Пагалыме ветераным саламлаш районысо тӱвыра пӧлкан методистше В.М. Саитов миен. Тудо район администрацийым вуйлатыше М.З. Ахмадуллин деч саламлыме серышым кучыктен. Нурей ялсоветын вуйлыкшо О.И. Атнагузина юбилярлан Россий Президент Владимир Путинын саламлыме серышыжым лудын, пӧлек-влакым кучыктен.  

Вашлиймаште юбилярым, тудын лишыл родо-шочшыжо-влакым мурыжо-влак дене ялысе «Чолга шӱдыр» ансамбль куандарен.

100 ийым темыше юбиляр-влак дене кугешнаш веле кодеш. Курым корным эртыше кажне еҥын - шкенжын илыш корныжо. Балбика Хисматовна Галина 1925 ий 20 августышто Шаран районысо Еммет ялеш шуко икшыван кресаньык ешыште шочын. Аваже Балшикар Тимирбулатовна ден ачаже Хисмат Самигуллинович вич икшывым ончен куштеныт. Балбика эн кугу икшыве улмаш. 1936 ийыште тӱҥалтыш школышто ныл классым тунем лектын да пашам ышташ тӱҥалын. 

1941 ийыште ачаже Кугу Ачамланде сарыш каен, Москва воктене кредалмаште вуйжым пыштен. Балбика колхозышто кугырак ӱдырамаш-влак дене иктӧр пашаш коштын. Тудлан презымат, кугурак вольыкымат ончаш логалын, пасушто гектар дене ревым куштен, амбарыштат тыршен. Сар пытымеке пӧръеҥ-влак эркын-эркын ялыш пӧртылаш тӱҥалыныт. 1949 ийыште Балбика Хисматовна фронтовик Акберде Султановичлан марлан лектын. Пелашыже Сталинград ола верч кредалмаште лийын, пленыш логалын, но вара куржын утлен. Сеҥымаш деч вара кум ий Донбассыште мландышӱйым лукмо шахтыште пашам ыштен, тидлан кӧра ялышкыже 1948 ийыште веле пӧртылын. Балбика ден Акберде Галинмыт 40 ий ваш йӧратен, келшен да пагален иленыт. Коктынат колхозышто тыршеныт. Нуно ныл икшывым: Гулбадиян, Гулъяна, Светлана ӱдыр-влакым да Анатолий эргым - ончен куштеныт. Таче Балбика Хисматовна 14 уныкаже да уныкаже-влакын 12 шочшыштлан куанен ила.

Тудын илыш школжо «Коммун корно» колхоз лийын, Балбика Хисматовна тушто ӱмыржӧ мучко - 45 ий - пашам ыштен. Колхозын лӱмжӧ гына вашталтын: «Коммун корно» - «Рассвет» - «Сюнь». 1980 ий гыч сулен налме канышыште улеш. Ынде 30 ий кокай Уфа олаште Гулбадиян ӱдыржӧ да Юрий веҥыже дене пырля ила. 

100 ияш юбилейжым Балбика Хисматовнан шке шочмо ялыштыже вашлиймыже шуын. Илалше еҥын тыланымашыжым шуктен, Юрий веҥыже тудым шкенжын суртышкыжо конден. Кызыт Емметыште ава-ачан пӧртыштыжӧ Анатолий эргыже ден Евдокия шешкыже илат. 

Кокайын юбилейже кугу пайремыш савырнен. Кувавайыштым саламлаш родо-шочшыжо Сургут, Октябрьский, Уфа олала, Еммет ял гыч погыненыт.

Кужу ӱмырын секретше нерген йодышлан пагалыме ветеран тыге вашештен: «Мый ӱмыр мучко поро шонымаш да поро паша дене иленам. Пашам тыршен ыштенам, еҥ-влаклан полшенам, сандене илыш мыланем кужу ӱмырым да пиалан ий-влакым пӧлеклен». Воктене шинчыше родо-шочшыжо-влак тудын чолга улмыж нерген ойленыт, «неле паша деч лӱдын шоген огыл» манын каласеныт.

Тыгай юбилей шуэн лиеда. Район кӱкшытыштӧ кугу илыш опытан кажне еҥым саламлымаш нуным пагалымашым ончыкта. Тыгай айдемым 100 ияш лӱмгечыж дене салаламлымаш - шукылан чапле пример!